നെടുമ്പാശ്ശേരി
വിദേശത്ത് നിന്ന് കൊച്ചി വിമാനത്താവളത്തിലെ എയർ കാർഗോയിൽ എത്തിയ വിലപിടിപ്പുള്ള ഇലക്ട്രോണിക്സ് വീട്ടുപകരണങ്ങൾ തട്ടിയെടുത്ത കേസിൽ മുൻ കസ്റ്റംസ് ഉദ്യോഗസ്ഥന് കോടതി മൂന്ന് വർഷം തടവും 1.20 ലക്ഷം പിഴയും വിധിച്ചു.
വിമാനത്താവളത്തിലെ മുൻ കസ്റ്റംസ് അസിസ്റ്റന്റ് കമ്മിഷണർ കെ.എസ് ചന്ദ്രശേഖറിനെയാണ് പ്രത്യേക സി.ബി.ഐ കോടതി ശിക്ഷിച്ചത്.
മറ്റ് രണ്ട് പ്രതികളെ കോടതി കുറ്റവിമുക്തരാക്കി. 2008 ലായിരുന്നു കേസിനാസ്പദമായ സംഭവം.
തൃശൂർ സ്വദേശിക്ക് സമ്മാനമായി കുവൈത്തിൽ നിന്ന് എത്തിയതായിരുന്നു സാധനങ്ങൾ. ഇവ ചന്ദ്രശേഖർ ഗൂഢാലോചന നടത്തി തട്ടിയെടുക്കുകയായിരുന്നുവെന്നാണ് കണ്ടെത്തിയത്.
വിലപിടിപ്പുള്ള പ്ലാസ്മ ടി.വി, മ്യൂസിക് സിസ്റ്റം തുടങ്ങിയ ഇലക്ട്രോണിക്സ് ഉപകരണങ്ങളായിരുന്നു കാർഗോയിൽ എത്തിയത്. ഇവ വിട്ടു നൽകാൻ സാധനങ്ങളുടെ വിലയേക്കാൾ കൂടുതൽ ഡ്യൂട്ടി നൽകണമെന്ന് ഇയാൾ ആവശ്യപ്പെടുകയായിരുന്നു. കസ്റ്റംസ് വിട്ടുവീഴ്ച ചെയ്യാതിരുന്നതിനെ തുടർന്ന് തൃശൂർ സ്വദേശിക്ക് സാധനങ്ങൾ കൈപ്പറ്റാനായില്ല.
എന്നാൽ പിന്നീട് ഇതേ സാധനങ്ങൾ ഉപയോഗിച്ച വസ്‌തുക്കളായി രേഖപ്പെടുത്തി ഇലക്‌ട്രോണിക് ഇനങ്ങളുടെ മൂല്യം 30,000 രൂപയായി കാണിച്ച് 4,635 രൂപ കസ്റ്റംസ് ഡ്യൂട്ടി അടച്ച് റസിഡൻസ് റൂൾ ട്രാൻസ്ഫർ പ്രകാരം വിട്ടയക്കുകയായിരുന്നു.
സംഭവം നടന്ന് ഏതാനും മാസങ്ങൾക്ക് ശേഷം സി.ബി.ഐയ്ക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിൽ നടത്തിയ അന്വേഷണത്തിലാണ് വിവരങ്ങൾ പുറത്ത് വന്നത്. ബംഗളൂരുവിലുള്ള ചന്ദ്രശേഖറിന്റെ ഭാര്യയുടെ വീട്ടിലേക്കാണ് ഇലക്ട്രോണിക് സാധനങ്ങൾ കൊണ്ടുപോയതെന്ന് അന്വേഷണത്തിൽ കണ്ടെത്തി. ഈ വസ്തുക്കൾ 2012 ൽ ഇവിടെ നിന്ന് സി.ബി.ഐ പിടിച്ചെടുക്കുന്നതുവരെ പ്രതി വീട്ടുസാധനങ്ങളായി ഉപയോഗിച്ചിരുന്നു.
കേസിൽ ചന്ദ്രശേഖറിനും രണ്ട് സ്വകാര്യ വ്യക്തികൾക്കുമെതിരേയാണ് 2018 ൽ സി.ബി.ഐ കോടതിയിൽ കുറ്റപത്രം സമർപ്പിച്ചിരുന്നത്. ഇതിൽ സ്വകാര്യ വ്യക്തികളായ രണ്ട് പ്രതികളെയാണ് കോടതി വെറുതെ വിട്ടത്.