തിരുവനന്തപുരം: ജനങ്ങളെ ദുരിതത്തിലാക്കുന്ന സില്‍വര്‍ ലൈന്‍ പദ്ധതിയെ എന്ത് വിലകൊടുത്തും എതിര്‍ക്കുമെന്ന് എം.കെ മുനീര്‍. ജനങ്ങളുടെ നെഞ്ചത്തുകൂടി കെ റെയില്‍ പദ്ധതി നടപ്പാക്കാനാകില്ല. എതിര്‍ക്കുന്നവരെ തല്ലിത്തോല്‍പ്പിക്കാന്‍ കേരളം കമ്മ്യൂണിസ്റ്റ് ഗ്രാമമല്ലെന്നും അദ്ദേഹം പറഞ്ഞു.

കെ റെയില്‍ പദ്ധതിയുടെ ഭാഗമായി സ്ഥാപിക്കുന്ന കുറ്റി പറിച്ചാല്‍ ഇനിയും തല്ല് കിട്ടുമെന്ന സിപിഎം എംഎല്‍എ എ.എന്‍ ഷംസീറിന്റെ പ്രസ്താവനയ്ക്ക് മറുപടി നല്‍കുകയായിരുന്നു എം.കെ മുനീര്‍.

തല്ലിയാല്‍ ഇനിയും കൈയും കെട്ടി നോക്കി നില്‍ക്കില്ല.സാമ്പത്തികമായി ബാധ്യതയുണ്ടാക്കുന്ന പദ്ധതിയാണ്. അതിവേഗത്തില്‍ പോകണമെന്ന് പറയുന്നതിനോടുള്ള മറുപടി കെ റെയില്‍ അല്ല കേരളം ആണ് പ്രധാനമെന്നും മുനീര്‍ പറഞ്ഞു.

എന്ത് വന്നാലും കെ റെയില്‍ നടപ്പാക്കുമെന്ന് എ.എന്‍ ഷംസീര്‍ എം.എല്‍.എ പറഞ്ഞിരുന്നു.കെ റെയില്‍ നടപ്പാക്കുമെന്ന് ഇടതുപക്ഷം പ്രകടനപത്രികയില്‍ പറഞ്ഞതാണ്. അതിനുള്ള അംഗീകാരമാണ് ജനങ്ങള്‍ ഇടതുപക്ഷത്തിന് ഭൂരിപക്ഷം നല്‍കിയത്. ഇനി പ്രതിപക്ഷത്തിന്റെ അംഗീകാരം വേണ്ടെന്നും ഷംസീര്‍ പറഞ്ഞു.