കണ്ണൂര്‍: ബി.ജെ.പിക്കാരുടെ വോട്ട് തേടിയത് തൃപ്പൂണിത്തുറയിലെ യു.ഡി.എഫ് സ്ഥാനാര്‍ത്ഥിയാണ്. ഇത് യു.ഡി.എഫ്- ബി.ജെ.പി ബന്ധത്തിന് തെളിവല്ലേയെന്നും മുഖ്യമന്ത്രി പിണറായി വിജയന്‍. തൃപ്പുണിത്തുറയിലെ യുഡിഎഫ് സ്ഥാനാര്‍ത്ഥി കെ.ബാബു ബി.ജെ.പിക്കാര്‍ തനിക്ക് വോട്ട് ചെയ്യുമെന്ന് പറഞ്ഞതായും അദ്ദേഹം ചൂണ്ടിക്കാട്ടി. എല്‍.ഡി.എഫിന് അഡജസ്റ്റ്‌മെന്റ് രാഷ്ട്രീയമില്ലെന്നും യു.ഡി.എഫിന് തെരഞ്ഞെടുപ്പില്‍ ജനങ്ങള്‍ മറുപടി നല്‍കുമെന്നും അദ്ദേഹം കൂട്ടിച്ചേര്‍ത്തു.

കഴിഞ്ഞ ദിവസം മാതൃഭൂമി ന്യൂസിന് നല്‍കിയ അഭിമുഖത്തിലായിരുന്നു ബാബുവിന്റെ പ്രതികരണം. കഴിഞ്ഞ തവണ ബി.ജെ.പിക്ക് വോട്ടു നല്‍കിയവര്‍ വരെ ഇത്തവണ എല്‍.ഡി.എഫിനെ തോല്‍പിക്കാന്‍ തനിക്ക് വോട്ട് ചെയ്യുമെന്നായിരുന്നു അദ്ദേഹം പറഞ്ഞത്.

ശബരിമല ഉപയോഗിച്ച് ജനങ്ങളെ സ്വാധീനിക്കാണ് ചിലര്‍ ശ്രമിക്കുന്നത്. എന്നാല്‍ ഇപ്പോള്‍ ശബരിമലയില്‍ ഒരു പ്രശ്‌നവുമില്ല. സുപ്രിം കോടതി അന്തിമ വിധി വന്ന ശേഷമായിരിക്കും തുടര്‍നടപടി. ശബരിമലയില്‍ വിഷയത്തില്‍ ആശങ്കയില്ലെന്നും അദ്ദേഹം വ്യക്തമാക്കി.

ശ്രീധരന്റേത് ജല്‍പനങ്ങളാണെന്ന് അദ്ദേഹം പരിഹസിച്ചു. ഏത് വിദഗ്ധനും ബി.ജെ.പി ആയാല്‍ ബി.ജെ.പി സ്വഭാവം കാണിക്കുമെന്നും മുഖ്യമന്ത്രി കൂട്ടിച്ചേര്‍ത്തു. ലൈഫ് മിഷന്‍ പിരിച്ചുവിടുമെന്ന് യു.ഡി.എഫ് പ്രഖ്യാപനം ദുഃഖകരമെന്നും അദ്ദേഹം ചൂണ്ടിക്കാട്ടി.