ലണ്ടന്‍: ന്യൂ കാസില്‍ യുനൈറ്റഡ് ചാംപ്യന്‍സ് ലീഗ് ഫുട്‌ബോളില്‍ യോഗ്യത നേടിയാല്‍ ക്രിസ്റ്റിയാനോ റൊണാള്‍ഡോ കളിക്കുമെന്ന വാര്‍ത്ത തെറ്റെന്ന് ന്യൂകാസില്‍ കോച്ച് എഡ്ഡി ഹോവ്. ന്യൂ കാസിലിനു വേണ്ടിയും പന്തുതട്ടാന്‍ അനുവദിക്കുന്ന വിധത്തിലാണ് സഊദി ക്ലബ്ബായ അന്നസറുമായി ക്രിസ്റ്റിയാനോ കരാര്‍ ഒപ്പിട്ടതെന്നായിരുന്നു റിപ്പോര്‍ട്ടുകള്‍. 200 മില്യണ്‍ യൂറോയ്ക്ക് 2025 ജൂണ്‍ വരെയാണ് പോര്‍ച്ചുഗല്‍ സൂപ്പര്‍ താരം അന്നസറുമായി കരാറിലെത്തിയത്.

മാഞ്ചസ്റ്റര്‍ യുനൈറ്റഡ് ക്ലബ് വിട്ടതോടെ 37കാരനായ ക്രിസ്റ്റ്യാനോയ്ക്ക് ലോകത്തെ ഏറ്റവും ശ്രദ്ധേയമായ ക്ലബ്ബ് ഫുട്‌ബോള്‍ ടൂര്‍ണമെന്റായ ചാംപ്യന്‍സ് ലീഗില്‍ കളിക്കാനാവില്ലെന്ന് ഉറപ്പായിരുന്നു. യൂറോപ്പിലേതു പോലെ ഫുട്‌ബോളിന്റെയും പ്രശസ്തിയുടെയും കൊടുമുടിയില്‍ നില്‍ക്കാന്‍ കഴിയില്ലെന്നും നിരീക്ഷകര്‍ നിരൂപിക്കുകയുണ്ടായി. യൂറോപ്പിലെ തന്റെ ജോലി കഴിഞ്ഞുവെന്ന് അന്നസറുമായുള്ള കരാര്‍ പ്രഖ്യാപിക്കവെ ക്രിസ്റ്റ്യാനോ പറഞ്ഞിരുന്നു.

ഇതിനിടെയാണ് ന്യൂകാസില്‍ യുനൈറ്റഡ് ചാംപ്യന്‍സ് ലീഗ് ഫുട്‌ബോളില്‍ യോഗ്യത നേടിയാല്‍ കരാര്‍ വ്യവസ്ഥയില്‍ ക്രിസ്റ്റ്യാനോയെ കളിക്കാന്‍ അന്നസര്‍ വിട്ടുകൊടുക്കുമെന്ന റിപ്പോര്‍ട്ടുകള്‍ പുറത്തുവന്നത്. എന്നാല്‍ ഇതിന് അല്‍പായുസ് മാത്രമാണുണ്ടായത്. ന്യൂകാസില്‍ കോച്ചിന്റെ പ്രസ്താവനയോടെ കിംവദന്തികള്‍ അവസാനിച്ചു. ക്രിസ്റ്റിയാനോയ്ക്ക് എല്ലാവിധ ആശംസകളും നേരുന്നുവെന്നും എന്നാല്‍ ന്യൂകാസിലുമായി ബന്ധപ്പെട്ട വാര്‍ത്തയില്‍ വാസ്തവമില്ലെന്നും കോച്ച് എഡ്ഡി ഹോവ് പറഞ്ഞു. ഇംഗ്ലീഷ് പ്രീമിയര്‍ ലീഗില്‍ ന്യൂ കാസില്‍ ഇപ്പോള്‍ മൂന്നാംസ്ഥാനത്താണ്.

ഇന്നലെ രാത്രി കുടംബത്തോടൊപ്പം റിയാദിലെത്തിയ 37കാരനായ ക്രിസ്റ്റ്യാനോയ്ക്ക് ഉജ്വല വരവേല്‍പ്പാണ് ലഭിച്ചത്.