റിയാദ്: സൂപ്പര്‍ താരം ക്രിസ്റ്റ്യാനോ റൊണാള്‍ഡോയെ അല്‍ നസറിലെത്തിച്ചതിനു പിന്നാലെ ലോക ഫുട്‌ബോളിലെ മിന്നും താരങ്ങളെ സഊദിയിലെത്തിക്കാന്‍ ശ്രമം തുടങ്ങി. ലയണല്‍ മെസ്സി, ലൂക്ക മോഡ്രിച്ച്, സെര്‍ജിയോ റാമോസ് തുടങ്ങിയവരെ കൊണ്ടുവരാനാണ് നീക്കം. കൂടുതല്‍ വിദേശ താരങ്ങളെ രാജ്യത്ത് എത്തിക്കുമെന്ന് സഊദി കായിക മന്ത്രി അടുത്തിടെ പ്രഖ്യാപിച്ചിരുന്നു.

മെസ്സിക്കു വേണ്ടി സഊദി ലീഗിലെ അല്‍ നസറിന്റെ ബദ്ധവൈരികളായ അല്‍ ഹിലാല്‍ ക്ലബ്ബാണ് ശ്രമം തുടങ്ങിയത്. നിലിവില്‍ പി.എസ്.ജിക്കു കളിക്കുന്ന മെസ്സിയുടെ കരാര്‍ കാലാവധി അവസാനിക്കുകയാണ്. പുതിയ സീസണിലേക്ക് ഒരു ക്ലബ്ബുമായും മെസ്സി ഇതുവരെ കരാറിലെത്തിയിട്ടില്ല. മെസ്സിയെ അല്‍ ഹിലാല്‍ സമീപിച്ചതായി അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്യുന്നു. കുവൈത്തിലെ മുന്‍ ഇന്‍ഫര്‍മേഷന്‍ മന്ത്രി ഡോ. സാദ് ബിന്‍ തഫേല അല്‍ അജ്മി ഇക്കാര്യം സ്ഥിരീകരിക്കുകയും ചെയ്തു.

അതേസമയം, ലോകകപ്പില്‍ മൂന്നാം സ്ഥാനത്തെത്തിയ ക്രൊയേഷ്യയുടെ ശ്രദ്ധേയ താരം ലൂക്ക മോഡ്രിച്ച് അല്‍ നസറിന്റെ ക്ഷണം നിരസിച്ചു. അടുത്ത സീസണില്‍ സ്പാനിഷ് ലീഗില്‍ കളിക്കാനാണ് ഉദ്ദേശിക്കുന്നതെന്ന് താരം വ്യക്തമാക്കിയതായി സ്‌പെയിനിലെ പ്രമുഖ മാധ്യമമായ മാര്‍ക്ക റിപ്പോര്‍ട്ട് ചെയ്തു. മോഡ്രിച്ചിനു പുറമേ സെര്‍ജിയോ റാമോസിനേയും അല്‍ നസര്‍ നോട്ടമിട്ടിട്ടുണ്ട്. റാമോസിന് ഈ ര്‍ഷം പകുതിവരെ പി.എസ്.ജിയുമായി കരാറുണ്ട്. കണ്ണഞ്ചിപ്പിക്കുന്ന ഓഫറാണ് അല്‍ നസര്‍ റാമോസിനു മുന്നില്‍ വച്ചതെന്നാണ് റിപ്പോര്‍ട്ട്.

1950കളുടെ മധ്യത്തില്‍ സ്ഥാപിതമായ റിയാദിലെ അല്‍നസര്‍ രാജ്യത്തെ ഏറ്റവും വിജയകരമായ ക്ലബ്ബുകളിലൊന്നാണ്. ഒമ്പത് പ്രീമിയര്‍ ലീഗ് കിരീടങ്ങള്‍ നേടിയ അവര്‍ 1998ല്‍ ഏഷ്യന്‍ വിന്നേഴ്‌സ് കപ്പും ഏഷ്യന്‍ സൂപ്പര്‍ കപ്പും നേടി. മുന്‍ ലിയോണ്‍ കോച്ച് റൂഡി ഗാര്‍ഷ്യയാണ് അല്‍ നസര്‍ നിയന്ത്രിക്കുന്നത്. ഇറ്റലിക്കു വേണ്ടി 2006 ലോകകപ്പ് നേടിയ ടീമംഗം ഫാബിയോ കന്നവാരോ ക്ലബ്ബിന്റെ മുന്‍ മാനേജര്‍മാരില്‍ ഏറ്റവും ശ്രദ്ധേയനാണ്. കഴിഞ്ഞ സീസണില്‍ അല്‍ നസര്‍ സൗദി ലീഗില്‍ മൂന്നാംസ്ഥാനത്തായിരുന്നു.