മഡ്ഗാവ്: കേരള ബ്ലാസ്‌റ്റേഴ്‌സിന്റെ ആരാധകര്‍ കാത്തിരുന്ന നിമിഷമെത്തി. മഡ്ഗാവിലെ വാസ്‌കോ തിലക് മൈതാന്‍ സ്‌റ്റേഡിയത്തില്‍ ജംഷേദ്പുര്‍ എഫ്.സിയെ തോല്‍പിച്ച് കൊമ്പന്‍മാര്‍ ഐഎസ്എല്‍ ഫൈനലില്‍.

രണ്ടാം പാദ സെമി ഫൈനലില്‍ ഇരുടീമുകളും 1-1ന് സമനിലയില്‍ പിരിഞ്ഞപ്പോള്‍ ആദ്യ പാദത്തിലെ ഗോളാണ് ബ്ലാസ്‌റ്റേഴ്‌സിന്റെ രക്ഷക്കെത്തിയത്. ഇതോടെ ഇരുപാദങ്ങളിലുമായി മഞ്ഞപ്പടയ്ക്ക് 2-1ന്റെ വിജയം. 

സഹല്‍ അബ്ദുല്‍ സമദ് നേടിയ ഗോളിന്റെ കരുത്തില്‍ ആദ്യപാദത്തിലെ 1-0 ന്റെ ജയമാണ് ബ്ലാസ്റ്റേഴ്സിന് ഫൈനലിലേക്ക് വഴിയൊരുക്കിയത്. ഇരുപാദങ്ങളിലുമായി ബ്ലാസ്റ്റേഴ്സ് 2-1 ന്റെ ജയം സ്വന്തമാക്കി.

അഡ്രിയാന്‍ ലൂണയുടെ മാന്ത്രിക ഗോളാണ് ബ്ലാസ്റ്റേഴ്സിന് കരുത്തായത്. പ്രണോയ് ഹാല്‍ദര്‍ ജംഷഡ്പുരിന്റെ ആശ്വാസഗോള്‍ നേടി. മൂന്നാം തവണയാണ് ബ്ലാസ്റ്റേഴ്സ് ഐ.എസ്.എല്ലിന്റെ ഫൈനലില്‍ എത്തുന്നത്. 2014 ല്‍ പ്രഥമ ഐ.എസ്.എല്ലിന്റെ ഫൈനല്‍ കളിച്ച ബ്ലാസ്റ്റേഴ്സ് 2016 ലും കലാശപ്പോരിന് എത്തി തോല്‍വിയോടെ മടങ്ങിയിരുന്നു. നീണ്ട കാത്തിരിപ്പിന് ഒടുവിലാണ് ബ്ലാസ്റ്റേഴ്സ് ഇത്തവണ ഫൈനല്‍ ഉറപ്പിച്ചത്.