ബീജിങ്
കൊവിഡിൽ വീണ്ടും വിറച്ച് ചൈന. ചൈനയുടെ സീറോ കൊവിഡ് യജ്ഞത്തിന് തിരിച്ചടിയായി സ്റ്റെൽത്ത് ഒമിക്രോൺ അതിവേഗം പടരുകയാണ്. 5,280 പുതിയ കേസുകളാണ് ഇന്നലെ മാത്രം ചൈനയിൽ റിപ്പോർട്ട് ചെയ്തിരിക്കുന്നത്. തൊട്ടു മുമ്പത്തെ ദിവസത്തെ കണക്കിൻ്റെ ഇരട്ടിയാണിത്. കൊവിഡ് വ്യാപനം അതിരൂക്ഷമായതിനെ തുടർന്ന് രാജ്യത്ത് പ്രവിശ്യകൾ അടിസ്ഥാനമാക്കിയുള്ള ലോക്ക്ഡൗൺ പ്രഖ്യാപിച്ചിരിക്കുകയാണ്. ഇത്തരത്തിൽ 13 നഗരങ്ങളാണ് ഇന്നലെ മാത്രം ചൈനയിൽ പൂർണമായി അടച്ചത്. ഭാഗികമായി അടച്ച നഗരങ്ങളും നിരവധിയാണ്.

വടക്കുകിഴക്കൻ പ്രവിശ്യയായ ജിലിനെയാണ് കൊവിഡ് ഏറ്റവും രൂക്ഷമായി ബാധിച്ചിരിക്കുന്നത്. ദേശീയ ഹെൽത്ത് കമ്മിഷൻ്റെ കണക്കനുസരിച്ച് ചൊവ്വാഴ്ച മാത്രം 3,000 കൊവിഡ് കേസുകളാണ് ഇവിടെ റിപ്പോർട്ട് ചെയ്തിരിക്കുന്നത്. ചൈനയിലെ ഏറ്റവും വലിയ നഗരമായ ഷാങ്ഹായിയിൽ കടുത്ത നിയന്ത്രണങ്ങളാണ് ഏർപ്പെടുത്തിയിരിക്കുന്നത്. ഒമ്പത് ദശലക്ഷം ജനസംഖ്യയുള്ള ചാങ്ചുൻ ഉൾപ്പെടെയുള്ള നഗരങ്ങളിലും ശക്തമായ നിയന്ത്രണങ്ങളുണ്ട്. മൂന്ന് കോടി ജനങ്ങളാണ് ചൈനയിൽ ലോക്ക്ഡൗണിൽ കുടുങ്ങി കിടക്കുന്നത്. പല നഗരങ്ങളിലും നിരവധി ഫാക്ടറികൾ അടച്ചുപൂട്ടി. പലയിടങ്ങളിലും സൂപ്പർ മാർക്കറ്റുകൾ കാലിയായിക്കൊണ്ടിരിക്കുകയാണ്. ആയിരത്തിലധികം കേസുകൾ റിപ്പോർട്ട് ചെയ്യപ്പെടുന്ന ആറാമത്തെ ദിവസമാണ് ചൊവ്വാഴ്ച.

ബീജിങ്, ഷാങ്ഹായ് വിമാനത്താവളങ്ങളിൽ നിന്നുള്ള ഡസൻ കണക്കിന് വിമാനങ്ങളാണ് റദ്ദാക്കിയിരിക്കുന്നത്. കടുത്ത നിയന്ത്രണമുള്ള നഗരങ്ങളിൽ പൊതുഗതാഗതം പൂർണമായും തടഞ്ഞിട്ടുണ്ട്.സ്റ്റെൽത്ത് ഒമിക്രോൺ എന്ന പുതിയ വകഭേദം ഏറെ അപകടകാരിയായതിനാൽ ആരോഗ്യവകുപ്പ് അതീവ ജാഗ്രതയിലാണ്. ജനങ്ങളോട് മൂന്ന് വട്ടം കൊവിഡ് പരിശോധന നടത്താനാണ് അധികൃതർ നിർദേശിച്ചിരിക്കുന്നത്.ലോകത്തെ രണ്ടാമത്തെ വലിയ സമ്പദ് വ്യവസ്ഥയാണ് ചൈനയുടേത്. അതിനാൽ തന്നെ ദീർഘനാളത്തെ അടച്ചിടൽ ചൈനയുടെ സാമ്പത്തിക വളർച്ചയിൽ വിള്ളലുണ്ടാക്കുമെന്ന ആശങ്കയും അവിടെ ഉയരുന്നുണ്ട്. മാർച്ച് ആദ്യ ആഴ്ച മുതലാണ് ചൈനയിൽ കൊവിഡ് വീണ്ടും പിടിമുറുക്കിയത്.