കൊച്ചി: നടി ആക്രമിക്കപ്പെട്ട കേസില്‍ ദിലീപിന്റെ ഫോണ്‍രേഖകള്‍ നശിപ്പിച്ച സൈബര്‍ വിദഗ്ധന്‍ സായ് ശങ്കറിന്റെ വീട്ടില്‍ പരിശോധന. ഇയാളുടെ കോഴിക്കോട്ടെ വീട്ടിലാണ് സൈബര്‍ വിദഗ്ധരടക്കമുള്ള ക്രൈംബ്രാഞ്ച് സംഘം പരിശോധന തുടങ്ങിയത്. അതേ സമയം ഇയാളെ അന്വേഷണം സംഘം ഉടന്‍ ചോദ്യം ചെയ്യും. ഇതിന്റെ ഭാഗമായാണ് വീട്ടില്‍ പരിശോധന നടത്തുന്നത്. അഭിഭാഷകന്റെ ഓഫീസില്‍ രേഖകള്‍ നശിപ്പിച്ചത് സായ് ശങ്കര്‍ ആണെന്ന് ക്രൈം ബ്രാഞ്ച് കണ്ടെത്തിയിരുന്നു.
ദിലീപ് കോടതിക്ക് കൈമാറാത്ത ഫോണിലെ വിവരങ്ങള്‍ ഇയാളുടെ കൈവശമുണ്ടെന്നാണ് സൂചന. ദിലീപ് അറിയാതെയാണ് ഇയാള്‍ വിവരങ്ങള്‍ കൈവശപ്പെടുത്തിയത്. നാളെ സായ് ശങ്കറിനോട് ക്രൈംബ്രാഞ്ച് ഓഫിസില്‍ ഹാജരാകണം എന്നാവശ്യപ്പെട്ട് നോട്ടിസ് നല്‍കിയിട്ടുണ്ട്.

സായ് ശങ്കറിന്റെ ഫ്‌ളാറ്റിലും ഭാര്യയുടെ മാതാപിതാക്കളുടെ ഫ്‌ളാറ്റിലും ഭാര്യയുടെ ബുട്ടീക്കിലും ആയിരുന്നു റെയ്ഡ്. രാവിലെ എട്ടേകാലിന് തുടങ്ങിയ റെയ്ഡ് 4 മണിക്കൂര്‍ നീണ്ടു. റെയ്ഡില്‍ രണ്ടു മൊബൈല്‍ ഫോണും ഒരു ഐ പോഡും പിടിച്ചെടുത്തു. റെയ്ഡ് നടക്കുമ്പോള്‍ സായ് ശങ്കര്‍ വീട്ടിലുണ്ടായിരുന്നില്ല.