സ്വന്തം ലേഖകൻ
തിരുവനന്തപുരം
സർക്കാർ ജീവനക്കാരുടെ സേവനം മെച്ചപ്പെടുത്താൻ നിർണായക നടപടികളുമായി സർക്കാർ ഒരുങ്ങുന്നു. ഭരണപരിഷ്‌കാര കമ്മിഷൻ നൽകിയ ശുപാർശകൾ നടപ്പിലാക്കാനാണ് സർക്കാർ തീരുമാനം. ഇതുസംബന്ധിച്ച് ചീഫ് സെക്രട്ടറി തയാറാക്കിയ റിപ്പോർട്ട് മുഖ്യമന്ത്രി അംഗീകാരം നൽകി. സർക്കുലർ ഈ ആഴ്ച പുറത്തിറക്കും. ഉദ്യോഗസ്ഥരുടെ സ്ഥാനക്കയറ്റ മാനദണ്ഡങ്ങൾ അടിമുടി മാറ്റുകയാണ് ലക്ഷ്യം. ജോലിയും പ്രകടനവും കൃത്യമായി വിലയിരുത്താനാണ് തീരുമാനം. ഇനി മുതൽ സ്ഥാനക്കയറ്റം ജോലിയും കാര്യക്ഷമതയും വിലയിരുത്തി മാത്രമാകും നടപ്പിലാക്കുക.
ഫയൽ അകാരണമായി താമസിപ്പിക്കുക, ജനങ്ങളോടു മോശമായി പെരുമാറുക, ജോലിസമയത്ത് സീറ്റിലില്ലാതിരിക്കുക ഇവയെല്ലാം ഉദ്യോഗസ്ഥരുടെ പ്രകടനം വിലയിരുത്തുന്നതിനുള്ള മാനദണ്ഡങ്ങളിൽ ഉൾപ്പെടുത്തി. മേലുദ്യോഗസ്ഥരായിരിക്കും ഇക്കാര്യം പരിശോധിക്കുക. സർക്കാർ സർവിസിലുള്ള ഉദ്യോഗസ്ഥരെ ഗസറ്റഡ്, നോൺ ഗസറ്റഡ് എന്നുതിരിച്ച് സ്‌കോറിന്റെ അടിസ്ഥാനത്തിലായിരുന്നു ഇതുവരെ സ്ഥാനക്കയറ്റം നിശ്ചയിച്ചിരുന്നത്. ഗസറ്റഡ് ഓഫിസർമാർക്ക് 13ഉം നോൺ ഗസറ്റഡ് ഓഫിസർമാർക്ക് ഒമ്പതുമായിരുന്നു നേരത്തെയുള്ള സ്‌കോർ. ഇപ്പോഴത് രണ്ടുകൂട്ടർക്കും 20 മാർക്കാക്കി. പെരുമാറ്റവും സർവിസ് റൂളിന്റെ ഭാഗമാക്കി മാറ്റിയതോടെ ഉദ്യോഗസ്ഥരുടെ പ്രകടനത്തിലും വലിയ മാറ്റം വരുമെന്നാണ് സർക്കാരിന്റെ പ്രതീക്ഷ.