ശ്രീനഗർ: ജമ്മുകശ്മീരിനെ വിഭജിച്ച് സംസ്ഥാനത്തിന്റെ പ്രത്യേകാധികാരം എടുത്തുകളഞ്ഞ കേന്ദ്രസർക്കാരിന്റെ തീരുമാനത്തിന് തിരിച്ചടിയായി ലഡാക്, ലേ, കാർഗിൽ മേഖലയിലെ നേതാക്കളുടെ പ്രതികരണങ്ങൾ. പ്രശ്‌നങ്ങൾ പരിഹരിക്കാനായി കേന്ദ്രസർക്കാർ രൂപീകരിച്ച ഉന്നതാധികാരസമിതിയുമായി സഹകരിക്കേണ്ടതില്ലെന്ന് ലേ, ലഡാക്, കാർഗിൽ എന്നിവിടങ്ങളിൽ നിന്നുള്ള നേതാക്കൾ പ്രഖ്യാപിച്ചു.

പ്രത്യേക അവകാശങ്ങളും പൂർണ സംസ്ഥാനപദവിയും എന്നതുൾപ്പെടെയുള്ള തങ്ങളുടെ ആവശ്യങ്ങൾ അംഗീകരിക്കാതെ സമിതിയുമായി സഹകരിക്കില്ലെന്ന് ലഡാക് ഡമോക്രാറ്റിക് അലയൻസും (എൽ.ഡി.എ) വ്യക്തമാക്കി. ഉന്നതാധികാരസമിതിയുമായി സഹകരിക്കില്ലെന്ന് ലേ അപെക്‌സ് ബോഡി(എൽ.എ.ബി), കാർഗിൽ ഡമോക്രാറ്റിക് അലയൻസ് (കെ.ഡി.എ) എന്നിവർ കഴിഞ്ഞദിവസം പ്രഖ്യാപിച്ചിരുന്നു. 15ന് പ്രക്ഷോഭം നടത്താനും ഇവർ പദ്ധതിയിട്ടുണ്ട്. 370ാം വകുപ്പ് എടുത്തുകളഞ്ഞതിനെത്തുടർന്ന് ജമ്മുകശ്മീരിലെ ജനങ്ങൾക്കിടയിലെ പ്രതിഷേധവും നീരസവും തണുപ്പിക്കുക എന്ന ഉദ്ദേശത്തോടെയാണ് കേന്ദ്ര ആഭ്യന്തരമസഹമന്ത്രി നിത്യാനന്ദ റായ് അധ്യക്ഷനായി ഉന്നതാധികാരസമിതി രൂപീകരിച്ചത്. ലഡാക് ലഫ്റ്റനന്റ് ഗവർണർ, ആഭ്യന്തരമന്ത്രാലയത്തിലെ ഉന്നത ഉദ്യോഗസ്ഥൻ, ഡമോക്രാറ്റിക് അലയൻസിലെ ഒമ്പത് അംഗങ്ങൾ എന്നിവരാണ് സമിതിയിലെ മറ്റംഗങ്ങൾ.

അതേസമയം, കേന്ദ്രത്തിനെതിരേ നിശിതവിമർശനമാണ് ബി.ജെ.പി നേതാവ് കൂടിയായ എൽ.ഡി.എ നേതാവും ലഡാക് ബുദ്ധിസ്റ്റ് അസോസിയേഷൻ സീനിയർ വൈസ്പ്രസിഡന്റുമായ ചെറിങ് ധോർജെ നടത്തിയത്. ഇതിനെക്കാൾ നല്ലത് ജമ്മുകശ്മീരിന്റെ ഭാഗമാകുന്നതാണെന്ന് അദ്ദേഹം പറഞ്ഞു. ഇപ്പോഴത്തെ സാഹചര്യം നോക്കുകയാണെങ്കിൽ നേരത്തെ ജമ്മുകശ്മീരിന്റെ ഭാഗമായപ്പോഴത്തെ അനുഭവമാണ് ഇതിനെക്കാൾ നല്ലതെന്ന് തോനുന്നു. ഉന്നതാധികാരസ മിതി ഉണ്ടാക്കി കേന്ദ്രസർക്കാർ സംസ്ഥാനത്തെ ജനങ്ങളെ വിഡ്ഡികളാക്കുകയാണെന്നും അദ്ദേഹം പറഞ്ഞു. ജമ്മുകശ്മീരിലെ മുതിർന്ന ബി.ജെ.പി നേതാവായ ദോർജെ സംസ്ഥാനത്തെ അവസാന സർക്കാരിലെ മന്ത്രിയുമായിരുന്നു.

തങ്ങളുടെ അവകാശം അടിച്ചമർത്തുകയാണെന്നും പാകിസ്താൻ ഗിൽജിത് ബൽതിസ്താനോട് പെരുമാറുന്നത് പോലെ ഞങ്ങളോട് പെരുമാറാൻ കേന്ദ്രസർക്കാരിനെ അനുവദിക്കില്ലെന്ന് കാർഗിൽ ഡമോക്രാറ്റിക് അലയൻസ് നേതാവ് സജാദ് ഹുസൈനും പറഞ്ഞു. പ്രത്യേക അവകാശങ്ങൾക്കും സമ്പൂർ സംസ്ഥാനമെന്നപദവിക്കും വേണ്ടി ഒരുവർഷത്തിലേറെയായി ലേ, ലഡാക്ക്, കാർഗിൽ എന്നിവിടങ്ങളിലെ ജനങ്ങൾ സമരത്തിലാണ്.

Setback For Centre, Ladakh Leaders Say Being Part Of Kashmir Was Better