കൊച്ചി: കളമശ്ശേരിയില്‍ നിര്‍മാണത്തിനിടെ മണ്ണിടിഞ്ഞുണ്ടായ അപകടത്തെക്കുറിച്ച് വിശദമായ അന്വേഷണം നടത്തുമെന്ന് ജില്ലാ കലക്ടര്‍ ജാഫര്‍ മാലിക്. എ.ഡി.എമ്മിനാണ് അന്വേഷണ ചുമതല. സുരക്ഷാ ക്രമീകരണങ്ങള്‍ പാലിച്ചോ എന്നു പരിശോധിക്കും. ക്രമക്കേടുകണ്ടെത്തിയാല്‍ നടപടി സ്വീകരിക്കും.
അതേ സമയം ഇവിടെ നടന്നുവരുന്ന നിര്‍മാണ പ്രവര്‍ത്തനങ്ങള്‍ നിര്‍ത്തിവെക്കാനും കലക്ടര്‍ ഉത്തരവിട്ടു. മരിച്ചവരുടെ മൃതദേഹങ്ങള്‍ വിമാനത്തില്‍ നാട്ടിലെത്തിക്കുമെന്നും കലക്ടര്‍ അറിയിച്ചു.
നിര്‍മാണത്തിനിടയില്‍ മണ്ണിടിഞ്ഞുവീണ് ഏഴു തൊഴിലാളികളാണ് മണ്ണിനടിയില്‍ കുടുങ്ങിയത്. ഇതില്‍ ആറുപേരെയും പുറത്തെത്തിച്ചുവെങ്കിലും പിന്നീട് നാടുപേര്‍ മരിച്ചു. ഒരാളെ ഇനിയും കണ്ടെത്തിയിട്ടില്ല.
ബംഗാള്‍ സ്വദേശികളായ ഫൈജുല്‍ മണ്ഡല്‍, നൗജാഷ്, കുടൂസ്, നൂറാമന്‍ എന്നിവരാണ് മരിച്ചത്. ഒരാള്‍ക്കായി തിരച്ചില്‍ തുടരുകയാണ്.
മെഡിക്കല്‍ കോളേജിനുസമീപം കളമശ്ശേരി നസ്റ്റ് ഗ്രൂപ്പിന്റെ ഇലക്ട്രോണിക് സിറ്റിയിലാണ് മണ്ണിടിച്ചിലില്‍ ഏഴുപേര്‍ കുടുങ്ങിയത്.