ബംഗ്ലൂരു: കര്‍ണാടകയിലെ പ്രധാനമന്ത്രി നരേന്ദ്ര മോദിയുടെ റോഡ് ഷോക്കിടെ സുരക്ഷാ വീഴ്ച. ഹുബ്ലിയിലാണ് സംഭവം. ദേശീയ യുവജനോത്സവം ഉദ്ഘാടനം ചെയ്യാനായാണ് മോദി ഹുബ്ലിയിലെത്തിയത്. ആള്‍ക്കൂട്ടത്തിനിടയില്‍ നിന്നും യുവാവ് ബാരിക്കേഡ് മറികടന്ന് പ്രധാനമന്ത്രിക്ക് അരികിലെത്തി. കയ്യില്‍ മാലയുമായാണ് ഇയാള്‍ ഓടിയെത്തിയത്. സുരക്ഷാ ജീവനക്കാര്‍ ഇയാളെ ബലം പ്രയോഗിച്ച് നീക്കുകയായിരുന്നു. 

ഇയാളെ പൊലിസിപ്പോള്‍ ചോദ്യം ചെയ്യുകയാണ്. ഇയാളെക്കുറിച്ച് കൂടുതല്‍ വിവരങ്ങളൊന്നും പൊലിസ് പുറത്തുവിട്ടിട്ടില്ല.
വിമാനത്താവളത്തില്‍ നിന്ന് റെയില്‍വേ സ്‌പോര്‍ട്‌സ് ഗ്രൗണ്ടിലേക്ക് റോഡ് ഷോ ആയാണ് പ്രധാനമന്ത്രി എത്തിയത്. വാഹനത്തില്‍ നിന്ന് ആള്‍ക്കൂട്ടത്തെ നോക്കി കൈവീശി മോദി വേദിയിലേക്ക് കയറി. ഇതിനിടെയായിരുന്നു ആള്‍ക്കൂട്ടത്തിനിടയില്‍ നിന്നും യുവാവ് ബാരിക്കേഡ് മറി കടന്ന് പ്രധാനമന്ത്രിക്ക് അരികിലെത്തിയത്.