കാഞ്ഞങ്ങാട്: മാന്തോപ്പ് മൈതാനിക്കടുത്ത ചരിത്ര മ്യൂസിയം അധികൃതരുടെ അനാസ്ഥ കാരണം മറിഞ്ഞു വീഴുമോയെന്ന ആശങ്കയിലാണ് നാട്ടുകാര്‍. ബ്രിട്ടീഷ് ഭരണകാലത്ത് നിര്‍മിച്ച ഹൊസ്ദുര്‍ഗിലെ പഴയ താലൂക്ക് ഓഫിസ് കെട്ടിടത്തിന്റെ ഒരു വശത്തെ കെട്ടിടത്തിനു മുകളിലെ ഓട് മേഞ്ഞ മേല്‍ക്കൂരയാണു തകര്‍ന്നിരിക്കുന്നത്.
ഹൊസ്ദുര്‍ഗില്‍ പുതിയ മിനിസിവില്‍ സ്റ്റേഷന്‍ കെട്ടിടം പ്രവര്‍ത്തനം ആരംഭിച്ചതോടെ താലൂക്ക് ഓഫിസ് ഉള്‍പ്പെടെ ഇതിലേക്ക് മാറി. ഇതിന്റെ ഉദ്ഘാടന ചടങ്ങില്‍ വച്ച് അന്നത്തെ മുഖ്യമന്ത്രി ഉമ്മന്‍ ചാണ്ടിയും സാംസ്‌കാരിക മന്ത്രിയും പഴയ താലൂക്ക് ഓഫിസ് കെട്ടിടം ചരിത്ര മ്യൂസിയമായി സംരക്ഷിക്കുമെന്നു പറഞ്ഞിരുന്നു. എന്നാല്‍ പ്രഖ്യാപനം ജലരേഖയായി മാറിയിരിക്കുകയാണ്. നൂറു വര്‍ഷത്തിലധികം പഴക്കമുള്ള ഈ കെട്ടിടം കേടുപാടുകളൊന്നും കൂടാതെ കാലങ്ങളായി പ്രൗഢിയോടെ ചരിത്രങ്ങള്‍ ഉറങ്ങുന്ന മാന്തോപ്പ് മൈതാനിക്കടുത്ത് തലയുയര്‍ത്തി നില്‍ക്കുകയാണ്.
എന്നാല്‍ ഇത് ചരിത്ര മ്യൂസിയമാക്കുമെന്നു ബന്ധപ്പെട്ടവര്‍ വാഗ്ദാനം നല്‍കിയിട്ട് രണ്ടു വര്‍ഷം തികയാറായെങ്കിലും ഇതിനുള്ള നടപടികളൊന്നും അധികൃതര്‍ സ്വീകരിച്ചിട്ടില്ല. ഈ കെട്ടിടത്തില്‍ ഇപ്പോള്‍ ജില്ലാ ആയുര്‍വേദിക് മെഡിക്കല്‍ ഓഫിസാണ് പ്രവര്‍ത്തിക്കുന്നത്. എന്നാല്‍ കെട്ടിടത്തിന്റെ പിന്‍ഭാഗത്തെ മേല്‍ക്കൂര തകര്‍ന്ന് മഴ വെള്ളം അകത്തേക്കു കയറുകയാണ്. ഇത് അധികൃതര്‍ കണ്ടില്ലെന്നു നടിക്കുന്നതോടെ കെട്ടിടം തന്നെ ഇല്ലാതാകുമെന്ന ആശങ്കയാണുള്ളത്.