തിരുവനന്തപുരം: കോണ്‍ഗ്രസ് നേതാവ് പ്രിയങ്ക ഗാന്ധി നേമത്ത് പ്രചാരണത്തിനെത്താതെ മടങ്ങിയതില്‍ പരിഭവവുമായി കെ.മുരളീധരന്‍. പരാതി മുരളീധരന്‍ തന്നെ പ്രിയങ്ക ഗാന്ധിയെ നേരിട്ടറിയിച്ചു. നേമത്ത് പ്രിയങ്ക പര്യടനം നടത്തിയില്ലെങ്കില്‍ അത് മറ്റു വ്യാഖ്യാനങ്ങള്‍ക്ക് ഇടയാക്കുമെന്ന് അദ്ദേഹം മുന്നറിയിപ്പ് നല്‍കി. എന്നാല്‍ ഏപ്രില്‍ മൂന്നിന് വീണ്ടുമെത്താമെന്ന് വാക്കുനല്‍കിയാണ് പ്രിയങ്ക മടങ്ങിയത്. കഴക്കൂട്ടം, നേമം മണ്ഡലങ്ങളിലെ പ്രചാരണത്തിനായി മൂന്നാം തീയതി അവര്‍ വീണ്ടുമെത്തുമെന്നാണറിയിച്ചിട്ടുള്ളത്.

നേമത്ത് പ്രചാരണ പ്രവര്‍ത്തനങ്ങള്‍ നല്ല രീതിയില്‍ നടക്കുന്നുണ്ടെന്ന് മുരളീധരന്‍ പറഞ്ഞു. ചില പ്രത്യേക സാഹചര്യങ്ങള്‍ കാരണമാണ് റോഡ് ഷോ നടക്കാതിരുന്നത്. കഴിഞ്ഞ തവണ ശശി തരൂര്‍ അനുഭവിച്ചതിന്റെ പകുതി പ്രശനം ഇപ്പോഴില്ലെന്നും മുരളീധരന്‍ അവകാശപ്പെട്ടു.