തിരുവനന്തപുരം: സംസ്ഥാനത്ത് ബസ് ചാര്‍ജ് വര്‍ധിപ്പിക്കണമെന്നാവശ്യപ്പെട്ട് ഇന്ന് അര്‍ധരാത്രി മുതല്‍ സ്വകാര്യ ബസ് സമരം പ്രഖ്യാപിച്ചതിനാല്‍ കെ.എസ്.ആര്‍.ടി.സി അധിക സര്‍വിസുകള്‍ നടത്തണമെന്ന് എം.ഡിയുടെ ഉത്തരവ്.

ബസ് ചാര്‍ജ് വര്‍ധന വൈകുന്നതില്‍ പ്രതിഷേധിച്ച് ഇന്ന് അര്‍ധരാത്രി മുതല്‍ സ്വകാര്യ ബസുടമകള്‍ അനിശ്ചിതകാല സമരമാരംഭിക്കാനിരിക്കെയാണ് കെ.എസ്.ആര്‍.ടി.സിയുടെ തീരുമാനം.

യൂണിറ്റുകളിലുള്ള മുഴുവന്‍ ബസും സര്‍വീസിനിറക്കാന്‍ കെ.എസ്.ആര്‍.ടി.സി നിര്‍ദേശം നല്‍കി. ആശുപത്രി,എയര്‍പോര്‍ട്ട്, റയില്‍വേ സ്റ്റേഷന്‍ എന്നിവിടങ്ങളിലേക്ക് പ്രത്യേക സര്‍വീസുണ്ടാവും. ജീവനക്കാര്‍ അവധിയെടുക്കുന്നതില്‍ നിയന്ത്രണം വരുത്തിയിട്ടുണ്ട്. സ്വകാര്യ ബസുടമകള്‍ ക്രമസമാധന പ്രശ്‌നമുണ്ടാക്കിയാല്‍ പൊലിസ് സഹായം തേടും.