കൊണ്ടോട്ടി: സ്‌കൂളിലെ മുഴുവന്‍ പേരുകളും കോര്‍ത്തിണക്കി കുട്ടികള്‍ തന്നെ പുറത്തിറക്കിയ പേര്പാട്ട്  ശ്രദ്ധേയമാകുന്നു. നെടിയിരുപ്പ് ഗവ. വെല്‍ഫയര്‍ യു.പി സ്‌കൂളിലെ  വിദ്യാര്‍ഥികളാണ് പേര്പാട്ടൊരുക്കിയത്. ക്ലാസ് മുറിയിലെ പഠന പ്രവര്‍ത്തനങ്ങളുടെ ഭാഗമായാണ് പേര്പാട്ടുകള്‍ രൂപംകൊണ്ടത്. ഓരോ കുട്ടിയും സ്വന്തം പേരും അതിനര്‍ഥവും സൂചനകളും അന്വേഷിച്ച് കണ്ടുപിടിച്ചാണ് രചനക്ക് തുടക്കം കുറിച്ചത്. ക്ലാസ്സ് മുറിയില്‍ വച്ചുതന്നെ ഓരോ പേരും പാട്ടായി മാറ്റുമ്പോള്‍ താളവും പ്രാസവും അധ്യാപകരുടെ സഹായത്തോടെ ചെയ്തു. സ്‌കൂളിലെ മുഴുവന്‍  കുട്ടികളുടേയും പേരുകള്‍ പാട്ടില്‍ ഉള്‍പ്പെട്ടതോടെ ഓരോരുത്തര്‍ക്കും അത് ഹൃദ്യസ്ഥവുമായി.
മിനിഊട്ടി ഹില്‍ട്ടോപ്പ് റിസോര്‍ട്ടില്‍ നടന്ന പേര്പാട്ട്  പുസ്തക പ്രകാശനം ഉപജില്ലാവിദ്യാഭ്യാസ ഓഫിസര്‍ കെ ആശിശ് നിര്‍വഹിച്ചു. നഗരസഭ കൗണ്‍സിലര്‍ വി.കെ ഗീത അധ്യക്ഷയായി. സി. സുന്ദരന്‍ ആദ്യകോപ്പി ഏറ്റുവാങ്ങി. ഹെഡ്മാസ്‌റ്റേഴ്‌സ് ഫോറം കണ്‍വീനര്‍ കെ.പി ഇസ്മാഈല്‍, മനോജ്, വി.കെ രാഘവന്‍, പി ഷാജി, പ്രധാനാധ്യാപിക കെ.ടി പത്മകുമാരി സംസാരിച്ചു.