തിരുവനന്തപുരം: കേരള സ്‌റ്റേറ്റ് ഇലക്ട്രിസിറ്റി ബോര്‍ഡ് ലിമിറ്റഡിന്റെ നാളെ നടക്കാനിരിക്കുന്ന 65ാം വാര്‍ഷികാഘോഷ പരിപാടിയില്‍ മതആത്മീയാചാര്യന്‍ ശ്രീ. എമ്മിനെ മുഖ്യപ്രഭാഷകനായി ക്ഷണിച്ച കെ.എസ്.ഇ.ബിയുടെ നടപടിക്കെതിരെ സിഐടിയു. ശ്രീ. എം നടത്തുന്ന പ്രഭാഷണം അനുവദിക്കില്ലെന്നും ബഹിഷ്‌കരിക്കുമെന്നുമാണ് സി.ഐ.ടി.യു സംഘടനയായ കെ.എസ്.ഇ.ബി വര്‍ക്കേഴ്‌സ് അസോസിയേഷന്‍ വ്യക്തമാക്കിയിരിക്കുന്നത്.

മാര്‍ച്ച് 31ന് തിരുവനന്തപുരം പട്ടത്ത് വൈദ്യുതി ഭവനില്‍ വെച്ച് നടക്കുന്ന കെ.എസ്.ഇ.ബിയുടെ വാര്‍ഷികാഘോഷ പരിപാടിയിലാണ് ശ്രീ എം മുഖ്യപ്രഭാഷകനായി എത്തുന്നത്. പൊതുജനങ്ങളുടെ പണമുപയോഗിച്ച് പ്രവര്‍ത്തിക്കുന്ന സ്ഥാപനങ്ങളില്‍ മതവര്‍ഗീയ ചിന്തകള്‍ പ്രചരിപ്പിക്കുന്ന തരത്തില്‍ ആത്മീയാചാര്യന്മാരെ കൊണ്ടുവന്ന് പ്രഭാഷണം നടത്തുന്നത് ഭരണഘടനാ ലംഘനമാണെന്നാണ് പ്രധാന വിമര്‍ശനം.

നാനാ ജാതി മതസ്ഥരും വിശ്വാസികളല്ലാത്തതവരും ഉള്‍പ്പെടെയുള്ളവര്‍ ജോലി ചെയ്യുന്ന കെ.എസ്.ഇ.ബിയില്‍ പ്രത്യേക വിശ്വാസം മുറുകെപിടിക്കുന്ന ആത്മീയചാര്യന്റെ പ്രഭാഷണം ശരിയല്ലെന്ന് സി.ഐ.ടി.യു വ്യക്തമാക്കി. നേരത്തേ, ഇത്തരമൊരു നീക്കം നടന്നപ്പോള്‍ തങ്ങളുടെ എതിര്‍പ്പ് മൂലം പരിപാടി ഉപേക്ഷിച്ചിരുന്നു. ഇത്തവണയും മാനേജ്‌മെന്റ് കൈക്കൊണ്ട തീരുമാനം ഉപേക്ഷിക്കണമെന്നും അല്ലാത്തപക്ഷം കെ.എസ്.ഇ.ബി വര്‍ക്കേഴ്‌സ് അസോസിയേഷന്‍ വാര്‍ഷികാഘോഷ പരിപാടി ബഹിഷ്‌കരിക്കുമെന്നും പ്രസ്താവനയില്‍ സംഘടന മുന്നറിയിപ്പ് നല്‍കുന്നുണ്ട്.