ഫൈസൽ കോങ്ങാട്
കേരളത്തിലെ വിവിധ മാധ്യമ സ്ഥാപനങ്ങളിൽ ജോലി ചെയ്യുന്ന ജേണലിസ്റ്റ്, നോൺജേണലിസ്റ്റ് ജീവനക്കാരുടെ പെൻഷൻ പദ്ധതി കൈകാര്യം ചെയ്യുന്ന ഗവ.സെക്രട്ടേറിയറ്റിലെ പെൻഷൻ വിഭാഗം പ്രവർത്തനം അവസാനിപ്പിക്കുന്നു.
സെക്ഷനിലെ ജീവനക്കാരെ മുഴുവൻ മറ്റ് വകുപ്പുകളിലേക്ക് പുനർവിന്യസിച്ചു. അവസാനമായി സെക്ഷനിലുണ്ടായിരുന്ന കംപ്യൂട്ടർ അസിസ്റ്റന്റിനെ വ്യവസായ വകുപ്പിലേക്ക് മാറ്റിക്കൊണ്ട് കഴിഞ്ഞ ദിവസമാണ് ഉത്തരവിറങ്ങിയത്.
മാധ്യമ പ്രവർത്തകരുടെയും സ്ഥാപനങ്ങളിലെ ഇതരജീവനക്കാരുടെയും ജോലിയിൽ നിന്ന് വിരമിച്ച ശേഷമുള്ള ഏക ആശ്രയമായ പെൻഷൻ പദ്ധതിയുടെ കടയ്ക്കൽ കത്തിവെക്കുന്ന നീക്കത്തിനാണ് സർക്കാർ നടപടി തുടങ്ങിയിരിക്കുന്നത്. സെക്ഷൻ ഓഫീസർ, ടൈപ്പിസ്റ്റ്, ഓഫീസ് അസിസ്റ്റന്റ്, സെക്രട്ടേറിയറ്റ് അസിസ്റ്റന്റ് എന്നീ തസ്തികളാണ് ഇവിടെയുണ്ടായിരുന്നത്.
എന്നാൽ ആറുമാസത്തെ കാലയളവിൽ മറ്റ് വകുപ്പുകളിൽ നിന്നും ജീവനക്കാരെ താൽക്കാലികമായി പി.ആർ.ഡിയുടെ പെൻഷൻ വിഭാഗത്തിൽ കൊണ്ടുവന്ന് ജോലി ചെയ്യിപ്പിക്കുകയാണെന്നും കാലാവധി കഴിഞ്ഞതുകൊണ്ട് അവരെ മടക്കുകയാണെന്നുമാണ് ബന്ധപ്പെട്ടവരുടെ പ്രതികരണം. എന്നാൽ മാധ്യമ പ്രവർത്തകരുടെ ആയിരക്കണക്കിന് പുതിയ അപേക്ഷകൾ പരിശോധനക്കായി കെട്ടിക്കിടക്കുമ്പോഴും സ്ഥിരമല്ലാത്ത സെക്ഷൻ സംവിധാനത്തിൽ പെൻഷനെ തകർക്കാനാണ് ശ്രമിക്കുന്നതെന്ന പരാതിയാണ് മാധ്യമ പ്രവർത്തകർക്കിടയിൽ നിന്നും ഉയരുന്നത്.
ജേണലിസ്റ്റ്, നോൺജേണലിസ്റ്റ് പെൻഷൻ പദ്ധതിയ്‌ക്കെതിരെ തുടക്കം മുതൽ തടസ്സം നിന്ന സെക്രട്ടേറിയറ്റിലെ ഒരു വിഭാഗം ജീവനക്കാരുടെ കൂട്ടായ്മ തന്നെയാണ് പെൻഷൻ വിഭാഗം കൈകാര്യം ചെയ്യുന്ന സെക്ഷനില്ലാതാക്കാനും മുൻപന്തിയിൽ നിൽക്കുന്നതെന്നാണ് ആരോപണം. ഭരണപരിഷ്‌കാര കമ്മീഷന്റെ പഠന റിപ്പോർട്ട് അനുസരിച്ച് സെക്രട്ടേറിയറ്റിൽ നടപ്പിലാക്കുന്ന ആകെ മാറ്റങ്ങളുടെ ഭാഗമാണ് ജീവനക്കാരുടെ പുനർവിന്യാസമെന്നാണ് സർക്കാർ വിശദീകരണമെങ്കിലും ഫലത്തിൽ നിലവിൽ പെൻഷൻ വാങ്ങിക്കൊണ്ടിരിക്കുന്നവരും, പുതുതായി പെൻഷൻ വാങ്ങാനുള്ളവരും ഇനി ഇക്കാര്യത്തിനായി ആരെ സമീപിക്കുമെന്ന ചോദ്യത്തിന് ബന്ധപ്പെട്ടവർക്ക് കൃത്യമായ മറുപടിയില്ല.
മാത്രമല്ല മാധ്യമപ്രവർത്തക പെൻഷൻ തുക വർധിപ്പിച്ചിട്ടും വർഷങ്ങളായി. കെ.എം മാണി ധനമന്ത്രിയായിരുന്നപ്പോൾ 15,000 രൂപയായി വർധിപ്പിക്കാൻ അന്നത്തെ മുഖ്യമന്ത്രി ഉമ്മൻചാണ്ടി ധനവകുപ്പിന് നിർദേശം നൽകിയിരുന്നു.
അത്രയും വർധന കഴിയില്ലെന്നും 12,000 ആക്കാമെന്നും ധനവകുപ്പ് തത്വത്തിൽ അംഗീകരിക്കുകയും ചെയ്തു.
പിന്നീട് കെ.എം മാണിയുമായി ബന്ധപ്പെട്ടുയർന്ന ബാർകോഴ വിവാദങ്ങളുടെ പശ്ചാത്തലത്തിൽ പെൻഷൻ തുക വർധന വേണ്ടെന്ന് വെക്കുകയായിരുന്നു.
എന്നാൽ പിണറായി സർക്കാർ അധികാരത്തിലെത്തിയപ്പോൾ പെൻഷൻ തുക വർധിപ്പിക്കുമെന്ന് പ്രതീക്ഷിച്ചവർക്ക് മുന്നിൽ ഇടിത്തീയായി 300 രൂപയായിരുന്ന പെൻഷൻ കോൺട്രിബ്യൂഷൻ 500 ആക്കി വർധിപ്പിക്കുകയാണുണ്ടായത്.
മാസങ്ങളോളം ശമ്പളം പോലും കിട്ടാതെ പണിയെടുക്കുന്ന സാധാരണക്കാരായ മാധ്യമപ്രവർത്തകരിൽ പലരും പദ്ധതിയിൽ നിന്ന് പുറത്തുപോകാൻ ഈ തീരുമാനം കാരണമായി.
ഡോ.തോമസ് ഐസക്ക് ധനമന്ത്രിയായിരിക്കെ ബജറ്റിൽ ജേണലിസ്റ്റ്, നോൺജേണലിസ്റ്റ് പെൻഷനിൽ ആയിരം രൂപ വർധന പ്രഖ്യാപിച്ചെങ്കിലും അതു ഇതുവരെ നടപ്പിലായിട്ടുമില്ല.
ആറ് മാസത്തിലധികം വിഹിതം അടക്കാതെ വന്നാൽ പദ്ധതിയിൽ നിന്ന് പുറത്താകുമെന്നാണ് വ്യവസ്ഥ.
ഇത്തരമൊരു സാഹചര്യത്തിൽ കൂടിയാണ് സെക്രട്ടേറിയറ്റിലെ പെൻഷൻ വിഭാഗം ഇല്ലാതാകുന്നതോടെ മാധ്യമ പ്രവർത്തകരുടെ പ്രതീക്ഷകളിൽ ഇരുൾ വീഴുകയാണ്.