കേപ്ടൗണ്‍: 2023 വനിതാ ട്വന്റി 20 ലോകകപ്പില്‍ ഇന്ത്യയ്ക്ക് വിജയത്തുടക്കം. ഗ്രൂപ്പ് ബിയില്‍ പാകിസ്താനെ തകര്‍ത്തുകൊണ്ട് ഇന്ത്യ വിജയമാഘോഷിച്ചു. ഏഴുവിക്കറ്റിനാണ് ഇന്ത്യയുടെ വിജയം. പാകിസ്താന്‍ ഉയര്‍ത്തിയ 150 റണ്‍സ് വിജയലക്ഷ്യം ഇന്ത്യ 19 ഓവറില്‍ മറികടന്നു. സ്‌കോര്‍: പാകിസ്താന്‍ 20 ഓവറില്‍ നാലിന് 149. ഇന്ത്യ 19 ഓവറില്‍ മൂന്നിന് 151.

അര്‍ധസെഞ്ചുറി നേടി പുറത്താവാതെ നിന്ന ജെമീമ റോഡ്രിഗസിന്റെ തകര്‍പ്പന്‍ പ്രകടനമാണ് ഇന്ത്യയ്ക്ക് തുണയായത്. ജെമീമ 38 പന്തുകളില്‍ നിന്ന് എട്ട് ബൗണ്ടറിയുടെ സഹായത്തോടെ പുറത്താവാതെ 53 റണ്‍സെടുത്തു. വാലറ്റത്ത് അടിച്ചുതകര്‍ത്ത റിച്ച ഘോഷും മികച്ച പ്രകടനം പുറത്തെടുത്തു.

ആദ്യം ബാറ്റു ചെയ്ത പാക് നിരയില്‍ ക്യാപ്റ്റന്‍ ബിസ്മ മെഹറൂഫിനും (55 പന്തില്‍ 68) ആയിഷ നസീമിനും(25 പന്തില്‍ 43) മാത്രമാണ് തിളങ്ങാനായത്. ഇരുവരും പുറത്താവാതെ പാകിസ്താനെ 149ലെത്തിച്ചെങ്കിലും ഇന്ത്യന്‍ ബാറ്റര്‍മാരെ എറിഞ്ഞു വീഴ്ത്താന്‍ കഴിഞ്ഞില്ല. ഇന്ത്യക്കു വേണ്ടി രാധാ യാദവ് രണ്ട് വിക്കറ്റും പൂജ വസ്ത്രകാര്‍, ദീപ്തി ശര്‍മ എന്നിവര്‍ ഒരു വിക്കറ്റും വീഴ്ത്തി.