കൊല്ലം: പണം ആവശ്യപ്പെട്ട് മദ്യലഹരിയിലായ മകന്‍ 84 വയസായ മാതാവിനെ ക്രൂരമായി മര്‍ദ്ദിച്ചു. കൊല്ലം തെക്കുഭാഗത്താണ് സംഭവം. ഗുരുതരമായി പരുക്കേറ്റ മാതാവ് ഓമനയെ ആശുപത്രിയില്‍ പ്രവേശിപ്പിച്ചു. മര്‍ദ്ദിക്കുന്നതിന്റെ ദൃശ്യങ്ങള്‍ പുറത്തുവന്നതോടെ സംഭവത്തില്‍ പൊലിസ് കേസെടുത്തു. മകന്‍ ഓമനക്കുട്ടനെ പൊലിസ് കസ്റ്റഡിയിലെടുത്തു.

അതേസമയം ആശുപത്രിയില്‍ മൊഴിയെടുക്കാനെത്തിയ പൊലിസിനോട് തന്നെ ആരും മര്‍ദ്ദിച്ചിട്ടില്ലെന്നാണ് ഓമന പറഞ്ഞത്. എന്നാല്‍ ദൃശ്യങ്ങളുടെ അടിസ്ഥാനത്തില്‍ കേസെടുക്കുകയായിരുന്നു.

അമ്മയുടെ കൈയ്യില്‍ പണം കൊടുത്തിട്ടുണ്ടെന്നും അത് തിരിച്ച് തരണം എന്ന് ആവശ്യപ്പെട്ടുമായിരുന്നു മര്‍ദനം. മര്‍ദനം തടയാന്‍ ശ്രമിച്ച സഹോദരനേയും ഇയാള്‍ മര്‍ദ്ദിച്ചു. മഴ നനഞ്ഞ മുറ്റത്ത് കൂടെ വലിച്ചഴക്കുകയും ചെയ്തു. മുതുകിനും തലയ്ക്കും കൈകൊണ്ട് മര്‍ദിച്ച ശേഷം വടി പോലുള്ള എന്തോ ഉപയോഗിച്ച് മര്‍ദിക്കുന്നതും ദൃശ്യത്തില്‍ കാണാം.