ഫൈസി താനൂർ
അന്നൊരു യുദ്ധം കഴിഞ്ഞെത്തിയപ്പോൾ ഖതാദ തന്റെ പടയങ്കി ധാന്യക്കൂമ്പാരത്തിനുള്ളിൽ സൂക്ഷിച്ചുവച്ചതായിരുന്നു. അയൽക്കാരനായ ത്വുഉമത്ത് ബിൻ ഉബൈക് അതു മോഷ്ടിച്ചെടുത്തു. തിരച്ചിലിനൊടുവിൽ ത്വുഉമയാണ് മോഷണം നടത്തിയതെന്ന് ഉടമ ഖതാദയ്ക്കു മനസിലായി. തന്റെ ധാന്യക്കൂമ്പാരത്തിൽനിന്നും പാറിയ പൊടിയെല്ലാം അയാളുടെ വീട്ടുവഴിയിൽ കണ്ടത് പ്രതിയെ മനസിലാക്കാൻ സഹായിച്ചു. പരാതിയുമായി ഖതാദ പ്രവാചക സദസിലെത്തി.

വിവരമറിഞ്ഞ് അസ്വസ്ഥനായ ത്വുഉമ, പിടിക്കപ്പെടുമെന്നുകണ്ടപ്പോൾ അടവുമാറ്റി. തൊണ്ടിമുതൽ എടുത്ത് അയാൾ മറ്റൊരു അയൽക്കാരനായ ജൂതന്റെ വീട്ടിൽ കൊണ്ടുവച്ചു. താനല്ല, അയൽക്കാരനായ സൈദ് എന്ന ജൂതനാണ് മോഷ്ടാവെന്നും തന്നെ വെറുതെ തെറ്റിദ്ധരിക്കുകയാണെന്നും അയാൾ സ്വന്തക്കാർക്കിടയിൽ പ്രചരിപ്പിച്ചു. അവർ അതേറ്റെടുത്തു. മുസ്‌ലിമിന്റെ പടയങ്കി മോഷ്ടിച്ചവൻ ഒരു ജൂതനാണെന്നും ജൂതൻ കട്ടെടുത്തത് പൊറുപ്പിക്കാനാവില്ലെന്നും അവർ പറഞ്ഞു. ഞങ്ങളുടെ ബന്ധുവായ ത്വുഉമയെ ജനം വെറുതെ തെറ്റിദ്ധരിക്കുകയാണെന്നും യഥാർഥ കള്ളനായ ജൂതനെ ശിക്ഷിക്കണമെന്നും അയാളുടെ ബന്ധുക്കൾ പ്രവാചകസദസിൽ വന്നു പറഞ്ഞു. മതംപറഞ്ഞ് നീതിയെ വഴിതിരിച്ചുവിടുകയും നിരപരാധിയെ അപരാധിയാക്കുകയുമായിരുന്നു പലരും.

എന്തു ചെയ്യണമെന്നറിയാതെ ഒരുനിമിഷം മുഹമ്മദ് (സ) ശങ്കിച്ചുനിന്നു. ആ സമയത്താണ് സപ്തവാനങ്ങൾക്കപ്പുറത്തുനിന്നും ഖുർആനിന്റെ ദിവ്യസന്ദേശം. ജൂതൻ നിരപരാധിയാണെന്നും മുസ്‌ലിമാണ് കുറ്റവാളിയെന്നും ഒരിക്കലും നേരിനുപകരം വഞ്ചകരുടെ കൂടെനിൽക്കരുതെന്നും അന്നേരം അവതരിച്ച ഖുർആൻ വചനം നബിയെ ബോധ്യപ്പെടുത്തി. നബിയത് ഉമ്മത്തിനു മുന്നിൽ ഓതിക്കേൾപ്പിച്ചു:
'നിങ്ങൾക്ക് അല്ലാഹു കാണിച്ചുതന്നതിനൊത്ത് വിധികൽപ്പിക്കാൻ വേണ്ടിയാണ്, സത്യപ്രകാരം നിങ്ങൾക്കു നാം വേദഗ്രന്ഥം അവതരിപ്പിച്ചുതന്നിട്ടുള്ളത്. താങ്കൾ വഞ്ചകന്മാർക്കു വേണ്ടി വാദിക്കുന്നവനാവരുത്' (ഖുർആൻ 4/105).

ഇതു പ്രവാചകൻ പ്രഖ്യാപിച്ചു. നീതിക്കു മുന്നിൽ മതവും മാനവും നോക്കാതെ തിരുദൂതർ ഇടപെട്ടു. നിരപരാധിയായ ജൂതനുപകരം അപരാധിയായ മുസ്‌ലിമിനെ ശിക്ഷയ്ക്കു വിധിച്ചു. അയാൾ ഇസ്‌ലാം ഉപേക്ഷിച്ച് ശത്രുരാജ്യമായിരുന്ന മക്കയിലേക്ക് ഒളിച്ചോടി.
ഖുർആൻ ഉയർത്തിപ്പിടിക്കുന്ന നീതിബോധം ഇങ്ങനെയാണ്. അവിടെ ജാതിമത വിവേചനങ്ങൾക്കു സ്ഥാനമില്ല. എല്ലാവർക്കും നീതി ലഭിക്കണം. അല്ലാത്തവ വിചാരണ ചെയ്യപ്പെടണം. ദുനിയാവിൽനിന്ന് സാധിക്കുന്നവ അങ്ങനെ. അല്ലാത്തവ പരലോകത്തുവച്ചും. അതുകൊണ്ട് നീതിബോധത്തോടെ ജീവിക്കാൻ വിശ്വാസി ബാധ്യസ്ഥനാണ്. അത് ഖുർആനിന്റെ കൽപ്പനയാണ്.