കൊണ്ടോട്ടി: അന്തരിച്ച തിരക്കഥാകൃത്ത് ടി.എ. റസാഖിന് അര്‍ഹമായ അംഗീകാരം നല്‍കുമെന്നു സാംസ്‌കാരിക മന്ത്രി എ.കെ. ബാലന്‍ പറഞ്ഞു. കൊണ്ടോട്ടി തുറക്കല്‍ ബാപ്പു നിവാസില്‍ റസാഖിന്റെ കുടുംബാംഗങ്ങളെ സന്ദര്‍ശിക്കാനത്തെിയതായിരുന്നു മന്ത്രി. വൈക്കം മുഹമ്മദ് ബഷീറിനു ശേഷം താന്‍ ജീവിച്ചു വളര്‍ന്ന സമൂഹത്തെ വ്യത്യസ്തമായ തരത്തില്‍ ആഴത്തില്‍ മനസിലാക്കിയ കലാകാരനാണു റസാഖെന്നും മന്ത്രി പറഞ്ഞു. ഭാര്യ ഖമറുന്നീസ മക്കളായ സുനിലാസ്, സംഗീത, മരുമകന്‍ ഡോ. ഇമിത്ത് എന്നിവരെ മന്ത്രി ആശ്വസിപ്പിച്ചു. കരള്‍ രോഗ ബാധിതനായിരുന്ന റസാഖിന് കരള്‍ നല്‍കിയ സഹോദരന്‍ കുഞ്ഞിക്കോയയുമായും മന്ത്രി സംസാരിച്ചു. സി.പി.എം ജില്ലാ സെക്രട്ടറി പി.പി. വാസുദേവന്‍, പ്രമോദ് ദാസ്, സന്തോഷ്, മോഹന്‍ദാസ് എന്നിവരും മന്ത്രിയോടൊപ്പം വീട്ടിലെത്തി.