ന്യൂഡൽഹി
സുപ്രിംകോടതിയുടെ സ്‌റ്റേ ഉത്തരവ് ലഭിച്ചിട്ടും ജഹാംഗീർപുരിയിൽ പൊളിക്കൽ തുടർന്നെന്നും താൻ തടഞ്ഞില്ലായിരുന്നെങ്കിൽ പൂർണമായും ഇടിച്ചുനിരത്തുമായിരുന്നുവെന്നും സി.പി.എം പൊളിറ്റ്ബ്യൂറോ അംഗം ബൃന്ദ കാരാട്ട് സുപ്രിംകോടതിയിൽ. കേസിൽ ബൃന്ദ കാരാട്ടും കക്ഷി ചേർന്നു.
സുപ്രിംകോടതി ഉത്തരവ് 10.45ന് തന്നെ ബന്ധപ്പെട്ടവരെ നേരിട്ട് അറിയിച്ചെങ്കിലും 12.25 വരെ പൊളിക്കൽ തുടർന്നതായി ബൃന്ദ കാരാട്ടിന്റെ അഭിഭാഷകൻ പി.വി സുരേന്ദ്രനാഥ് ജസ്റ്റിസ് എൽ. നാഗേശ്വറാവു അധ്യക്ഷനായ ബെഞ്ചിനെ അറിയിച്ചു.
പാവപ്പെട്ടവരുടെ വീടുകളും ജീവിതോപാധികളുമാണ് പൊളിച്ചതെന്ന് അഭിഭാഷകൻ തുടർന്ന് ബോധിപ്പിച്ചു.
ഇതിൽ ഭൂരിഭാഗവും മുസ് ലിംകളുടേതാണ്. ആവർത്തിച്ച് ആവശ്യപ്പെട്ടിട്ടും 12.25വരെ പൊളിക്കൽ നിർത്തിയില്ലെന്നും അഭിഭാഷകൻ ചൂണ്ടിക്കാട്ടി.
കൃത്യം എത്ര മണിക്കാണ് സ്റ്റേ വിവരം അറിയിച്ചതെന്ന് കോടതി ആരാഞ്ഞു. 11 മണിക്ക് തന്നെ വാട്‌സാപ്പിലൂടെ രജിസ്ട്രി മേയർക്ക് ഉത്തരവ് കൈമാറിയതായി കപിൽ സിബലും ദുഷ്യന്ത് ദവെയും ബോധിപ്പിച്ചു.