ന്യൂഡല്‍ഹി: ജയിലില്‍ കഴിയുന്ന ഡല്‍ഹി മുഖ്യമന്ത്രി അരവിന്ദ് കെജ് രിവാളിന്റെ പഴ്‌സണല്‍ അസിസ്റ്റന്റ് (പി.എ) ബൈഭവ് കുമാറിനെ പുറത്താക്കി. മദ്യനയക്കേസിന്റെ ചോദ്യം ചെയ്യലിന് പിന്നാലെയാണ് കേന്ദ്ര വിജിലന്‍സി വിഭാഗം ബൈഭവിനെ പുറത്താക്കിയത്. 

അനധികൃത നിയമനമാണെന്ന് ചൂണ്ടിക്കാട്ടിയാണ് നടപടി. ഔദ്യോഗിക കൃത്യനിര്‍വഹണം തടസപ്പെടുത്തിയതുമായി ബന്ധപ്പെട്ട് 2007ല്‍ ബിഭവിനെതിരേ കേസ് രജിസ്റ്റര്‍ ചെയ്യപ്പെട്ടിരുന്നു. ഈ കേസാണ് പുറത്താക്കലിന് കാരണമായി വിജിലന്‍സ് ചൂണ്ടിക്കാണിക്കുന്നത്. 

നോയിഡയില്‍ ഡെവലപ്‌മെന്റ് അതോറിറ്റിയില്‍ ജോലി ചെയ്തപ്പോള്‍ അന്ന് ബൈഭവ് ഉള്‍പ്പെടെ മൂന്നുപേര്‍, പൊതുസേവകനായിട്ടും തന്നെ ജോലി ചെയ്യാന്‍ സമ്മതിച്ചിരുന്നില്ലെന്ന് ചൂണ്ടിക്കാട്ടി മഹേഷ് പാല്‍ എന്നയാള്‍ നല്‍കിയ പരാതിയാണ് പുറത്താക്കലിന് ആധാരം. ബൈഭവിന്റെ നിയമനത്തിനു മുന്‍പ് പശ്ചാത്തല പരിശോധന നടത്തിയില്ലെന്നാണ് വിജിലന്‍സ് ഇപ്പോള്‍ കണ്ടെത്തിയിരിക്കുന്നത്. ഡല്‍ഹി മദ്യനയക്കേസില്‍ എന്‍ഫോഴ്‌സ്‌മെന്റ് ഡയറക്ടറേറ്റും നേരത്തെ അദ്ദേഹത്തിന് സമന്‍സ് അയച്ചിരുന്നു.