ചെന്നൈ: ലോക്‌സഭാ തെരഞ്ഞെടുപ്പിന് മുന്നോടിയായി പ്രകടനപത്രിക പുറത്തിറക്കി ഡി.എം.കെ. സി.എ.എയും ഏക സിവില്‍കോഡും നടപ്പാക്കില്ല, പുതുച്ചേരിക്ക് സംസ്ഥാന പദവിയും നീറ്റ് പരീക്ഷ നിരോധനം എന്നിവയെല്ലാം ഉള്‍പ്പെടുന്നതാണ് പ്രകടപത്രികയിലെ വാഗ്ദാനങ്ങള്‍. പ്രകടനപത്രികയ്‌ക്കൊപ്പം ഡി.എം.കെയുടെ ആദ്യഘട്ട സ്ഥാനാര്‍ഥി പട്ടികയും പുറത്തിറക്കി.

പൗരത്വ നിയമ ഭേദഗതി പിന്‍വലിക്കും, ഗവര്‍ണര്‍ക്ക് അധികാരം നല്‍കുന്ന ഭരണഘടനയിലെ ആര്‍ട്ടിക്കിള്‍ 361 റദ്ദാക്കും, സ്ത്രീകള്‍ക്ക് 33% സംവരണം നടപ്പിലാക്കും, സംസ്ഥാനങ്ങള്‍ക്ക് ഫെഡറല്‍ അവകാശങ്ങള്‍ നല്‍കുന്നതിനായി ഇന്ത്യന്‍ ഭരണഘടനയില്‍ മാറ്റം വരുത്തും, ദേശീയ വിദ്യാഭ്യാസ നയം (എന്‍ഇപി) പിന്‍വലിക്കും, ടോള്‍ ഗേറ്റുകള്‍ നീക്കം ചെയ്യും തുടങ്ങിയ വാഗ്ദാനങ്ങളിലൂടെ രാജ്യത്ത് ചര്‍ച്ചയായ നിരവധി വിഷയങ്ങളില്‍ പാര്‍ട്ടി നയം വെളിപ്പെടുത്തുന്നതാണ് ഡി.എം.കെയുടെ പ്രകടന പത്രിക.

ആദ്യഘട്ട സ്ഥാനാര്‍ഥി പട്ടിക

നോര്‍ത്ത് ചെന്നൈ - കലാനിധി വീരസ്വാമി, സൗത്ത് ചെന്നൈ- തമിഴശൈ തങ്കപാണ്ഡ്യന്‍, സെന്‍ട്രല്‍ ചെന്നൈ - ദയാനിധി മാരന്‍, ശ്രീപെരുമ്പത്തൂര്‍ -ടി.ആര്‍.ബാലു, അരക്കോണം- ജഗത്രക്ഷകന്‍, വെല്ലൂര്‍- കതിര്‍ ആനന്ദ്, ധര്‍മപുരി - എ.മണി, തിരുവണ്ണാമലൈ- സി.എന്‍.അണ്ണാദുരൈ, അരണി  ധരണിവേന്ദന്‍, കാളക്കുറിച്ചി  മലയരശന്‍, ഈറോഡ്  കെ.ഇ.പ്രകാശ്, നീലഗിരി  എ.രാജ, കോയമ്പത്തൂര്‍  ഗണപതി രാജ്കുമാര്‍, പൊള്ളാച്ചി  കെ.ഈശ്വരസ്വാമി, തഞ്ചാവൂര്‍  എസ്.മുരസൊലി, തേനി  തങ്ക തമിഴ്‌സെല്‍വന്‍, തൂത്തുക്കുടി  കനിമൊഴി കരുണാനിധി, തെങ്കാശി  റാണി, കാഞ്ചീപുരം (എസ്‌സി) കെ സെല്‍വം എന്നിവരാണ് ആദ്യഘട്ട സ്ഥാനാര്‍ഥി പട്ടികയില്‍ ഇടംപിടിച്ചവര്‍. 

ഇതില്‍ 11 സ്ഥാനാര്‍ഥികള്‍ പുതുമുഖങ്ങളാണ്. 6 അഭിഭാഷകരും രണ്ട് ഡോക്ടര്‍മാരും രണ്ട് പി.എച്ച്.ഡി ജേതാക്കളും ഉള്‍പ്പെട്ടതാണ് ഡി.എം.കെയുടെ ആദ്യഘട്ട സ്ഥാനാര്‍ഥി പട്ടിക.