കാസര്‍കോട്: കര്‍ണാടകയില്‍നിന്ന് കാസര്‍കോട്ടെ ആശുപത്രികള്‍ക്ക് ഓക്‌സിജന്‍ നിഷേധിച്ചതിനെ തുടര്‍ന്ന് ആശുപത്രികളില്‍ ഓക്‌സിജന്‍ക്ഷാമം രൂക്ഷം. കാസര്‍കോട് നഗരത്തിലെ അരമന, കിംസ് തുടങ്ങിയ സ്വകാര്യ ആശുപത്രികളിലും ഇ.കെ നായനാര്‍ മെമ്മോറിയല്‍ ജില്ലാ സഹകരണ ആശുപത്രിയിലും ഇന്നലെ വൈകിട്ടുവരെയുള്ള ഓക്‌സിജന്‍ മാത്രമായിരുന്നു ഉണ്ടായിരുന്നത്. അതേസമയം ഓക്‌സിജന്റെ അഭാവം കാരണം ആശുപത്രിയില്‍ ഗുരുതരാവസ്ഥയില്‍ കഴിയുന്ന രോഗികളെയും ഓക്‌സിജന്‍ ആവശ്യമുള്ള രോഗികളെയും ഡിസ്ചാര്‍ജ് ചെയ്യാനുള്ള ഒരുക്കത്തിലാണ് ആശുപത്രി മാനേജ്‌മെന്റുകള്‍.

ഓക്‌സിജന്റെ അഭാവത്താല്‍ രോഗികളുടെ ജീവന്‍ നഷ്ടപ്പെട്ടാല്‍ ഉത്തരവാദിത്തം ഏറ്റെടുക്കേണ്ടി വരുമെന്ന ആശങ്കയിലാണ് ആശുപത്രി മാനേജ്‌മെന്റുകള്‍ ഇത്തരം നടപടികളിലേക്ക് നീങ്ങുന്നത്. ജില്ലയിലെ ഭൂരിഭാഗം സ്വകാര്യ ആശുപത്രികളിലും മംഗളൂരുവിലെ കമ്പനികളില്‍ നിന്നാണ് ഓക്‌സിജന്‍ വിതരണം നടത്തിയിരുന്നത്. കഴിഞ്ഞ ദിവസം ഓക്‌സിജന്‍ കൊണ്ടുവരുന്നതിന് ആശുപത്രികളില്‍ നിന്ന് വാഹനങ്ങള്‍ മംഗളൂരുവിലെ കമ്പനികളില്‍ എത്തിയപ്പോഴാണ് ഓക്‌സിജന്‍ നിഷേധിച്ച വാര്‍ത്ത അറിയുന്നത്. മംഗളൂരുവിലെ ഡെപ്യൂട്ടി കമ്മിഷണര്‍ നല്‍കിയ ഉത്തരവിനെ തുടര്‍ന്നാണ് കാസര്‍കോട്ടെ ആശുപത്രികള്‍ക്ക് ഓക്‌സിജന്‍ നിഷേധിച്ചത്.

വിദഗ്ധ ചികിത്സക്ക് മംഗളൂരുവിലെ ആശുപത്രികളില്‍ പോകാന്‍ സാധിക്കാത്ത ഒട്ടനവധി രോഗികള്‍ കാസര്‍കോട്ടെ ആശുപത്രികളെയാണ് അടിയന്തര സാഹചര്യത്തില്‍ അഭയം പ്രാപിക്കുന്നത്. ഇവരില്‍ പലര്‍ക്കും അടിയന്തര സാഹചര്യത്തില്‍ ഓക്‌സിജന്‍ ആവശ്യമായി വരുന്നുണ്ട്. ഇതിനുപുറമെയാണ് കൊവിഡ് ബാധിച്ച് ഗുരുതരാവസ്ഥയില്‍ ആകുന്ന രോഗികള്‍ക്കും ഓക്‌സിജന്‍ അത്യാവശ്യമായി വരുന്നത്.

കര്‍ണാടകയില്‍നിന്നു ഓക്‌സിജന്‍ നിഷേധിച്ച സംഭവത്തില്‍ രാജ്‌മോഹന്‍ ഉണ്ണിത്താന്‍ എം.പി, എന്‍.എ നെല്ലിക്കുന്ന് എം.എല്‍.എ എന്നിവര്‍ ഇടപെട്ടിട്ടുണ്ട്.

ചെറിയ ഓക്‌സിജന്‍ സിലിണ്ടര്‍ അത്യാസന്ന നിലയിലുള്ള രോഗിക്ക് ഒന്നെന്ന തോതില്‍ നല്‍കാമെന്ന വാഗ്ദാനം ഇന്നലെ മംഗളൂരുവിലെ കമ്പനികള്‍ എം.എല്‍.എയോട് സൂചിപ്പിട്ടുണ്ട്. എന്നാല്‍ മംഗളൂരുവിലേക്കുപോയി ഓക്‌സിജന്‍ കൊണ്ടുവരുമ്പോഴേക്കും രോഗിയുടെ ജീവന്‍ ബാക്കിയുണ്ടാകുമോ എന്ന ചോദ്യവും ഉയരുന്നുണ്ട്.