ഇരിട്ടി: ബോംബ് സ്‌ഫോടനത്തില്‍ ബി.ജെ.പി പ്രവര്‍ത്തകനും ഭാര്യയ്ക്കും പരുക്കേറ്റു. കാക്കയങ്ങാട് ആയിചോത്ത് പന്നിയോട്മുക്കിലെ മുക്കോലപറമ്പത്ത് ഹൗസിലെ എ.കെ സന്തോഷ് (35), ഭാര്യ ലസിത സന്തോഷ് (30) എന്നിവര്‍ക്കാണ് പരുക്കേറ്റത്. മുഖത്തും കൈക്കും ഗുരുതര പരുക്കേറ്റ സന്തോഷിനെയും നിസാരമായി പരുക്കേറ്റ ഭാര്യ ലസിതയെയും ആദ്യം ഇരിട്ടിയിലെ ആശുപത്രിയിലെത്തിച്ച് പ്രാഥമിക ചികിത്സക്കുശേഷം തലശേരിയിലെ സ്വകാര്യ ആശുപത്രിയിലേക്കു മാറ്റി. ഇന്നലെ വൈകിട്ട് ആറോടെയാണ് സംഭവം.

വീട്ടിനുള്ളില്‍ സൂക്ഷിച്ച ബോംബ് സുരക്ഷിത സ്ഥാനത്തേക്ക് മാറ്റുന്നതിനിടെയായിരുന്നു സ്‌ഫോടനം. അടുക്കളയുടെ പിറകുവശത്തെ മുറ്റത്തുവച്ച് സന്തോഷിന്റെ കൈയില്‍ നിന്നു ബോംബ് നിലത്തു വീഴുകയായിരുന്നുവെന്നാണ് പൊലിസ് പറയുന്നത്. സമീപത്ത് പാത്രം കഴുകയായിരുന്നു ഭാര്യ ലസിത. ഇതിനിടെയാണ് ലസിതയ്ക്കും പരുക്കേറ്റത്. വീട്ടിനുള്ളില്‍ നിന്നാണു ബോംബ് നിര്‍മിച്ചതെന്നു സംശയിക്കുന്നു.

രണ്ടുവര്‍ഷം മുമ്പ് വിഷുവിന്റെ തലേദിവസം സമാനമായ രീതിയില്‍ ഇതേ വീട്ടില്‍വച്ചുണ്ടായ സ്‌ഫോടനത്തില്‍ പരുക്കേറ്റ കാര്‍പന്റര്‍ തൊഴിലാളികൂടിയായ സന്തോഷിന്റെ വിരലുകള്‍ അറ്റുപോയിരുന്നു.