ക്രൈസ്റ്റ്ചര്‍ച്ച്: അവസാന ബോൾ വരെ ആവേശം നിറച്ച ശ്രീലങ്ക - ന്യൂസിലാൻഡ് ടെസ്റ്റിൽ ന്യൂസിലൻഡിന് വിജയം. നിര്‍ണായകമായ അഞ്ചാം ദിനത്തില്‍ ശ്രീലങ്ക ഉയര്‍ത്തിയ 285 റണ്‍സ് വിജയലക്ഷ്യം മുൻ നായകൻ കെയ്ൻ വില്യംസണിന്‍റെ സെഞ്ചുറി കരുത്തില്‍ കിവികള്‍ മറികടന്നു. ന്യൂസിലാൻഡ് ജയിച്ചതോടെ ലോക ടെസ്റ്റ് ചാമ്പ്യൻഷിപ്പ് ഫൈനലിലേക്ക് ഇന്ത്യ പ്രവേശിച്ചു.

ലോക ടെസ്റ്റ് ചാമ്പ്യൻഷിപ്പ് ഫൈനലിൽ എത്താൻ ഇന്ത്യക്ക് ഓസ്‌ട്രേലിയയ്ക്ക് എതിരെ നാലാം ഏകദിനത്തിൽ വിജയം അനിവാര്യമായിരുന്നു. എന്നാൽ നാലാം ടെസ്റ്റിന്റെ അവസാന ദിനമായ ഇന്ന് വിജയം പിടിക്കുക ഇന്ത്യക്ക് അസാധ്യമായിരിക്കുകയാണ്. അവസാന ടെസ്റ്റ് സമനിലയിലേക്ക് നീങ്ങുന്ന സാഹചര്യമാണ് ഉള്ളത്. ലോക ടെസ്റ്റ് ചാമ്പ്യൻഷിപ്പ് ഫൈനലില്‍ എത്തണമെങ്കില്‍ മറ്റൊരു സാധ്യത ഉണ്ടായിരുന്നത് ശ്രീലങ്കയ്ക്ക് എതിരെ ന്യൂസിലാൻഡ് വിജയിക്കണം എന്നതായിരുന്നു. ഇതാണ് അവസാന പന്ത് വരെ ആവേശം നീണ്ട മത്സരത്തിൽ സംഭവിച്ചത്.

അതേസമയം, എട്ട് വിക്കറ്റ് നഷ്ടത്തിലാണ് ന്യൂസിലന്‍ഡ് വിജയത്തിലെത്തിയത്. പുറത്താകാതെ 121 റണ്‍സ് നേടിയ വില്യംസണിന്‍റെ പോരാട്ടമാണ് കിവികളെ തുണച്ചത്. 86 പന്തില്‍ 81 റണ്‍സ് നേടി ഡാരി മിച്ചലും മികച്ച പിന്തുണ നല്‍കി. അവസാന ഓവർ വരെ നീണ്ട മത്സരം അവസാന പന്തിലാണ് കിവികൾക്ക് വിജയം സമ്മാനിച്ചത്, ഒപ്പം ഇന്ത്യക്ക് ഫൈനൽ ബർത്തും.

അവസാന ഓവറില്‍ എട്ട് റണ്‍സാണ് കിവീസ് പടക്ക് വേണ്ടിയിരുന്നത്. ലങ്കയുടെ അഷിതയുടെ ആദ്യ പന്തില്‍ വില്യംസണ് സിംഗിള്‍ മാത്രമാണ് നേടാനായത്. അടുത്ത പന്തില്‍ മാറ്റ് ഹെന്‍‍റിയും ഒരു റണ്‍സ് എടുത്തതോടെ വില്യംസണിന് സ്ട്രൈക്ക് ലഭിച്ചു. മൂന്നാം പന്തില്‍ ഡബിളിനായുള്ള കിവികളുടെ ശ്രമം തകര്‍ന്നതോടെ ഹെൻ‍റി റണ്‍ഔട്ടായി. എന്നാല്‍, അടുത്ത പന്തില്‍ ഫോര്‍ അടിച്ച വില്യംസണ്‍ വിജയത്തോട് അടുത്ത് സ്കോർ ഒപ്പമെത്തിച്ചു. അടുത്ത പന്തില്‍ ബൗണ്‍സര്‍ എറിഞ്ഞ് അഷിത മത്സരം അവസാന ബോളിലേക്ക് എത്തിച്ചു. അവസാന പന്തിലും വില്യംസണെ ഷോട്ട് കളിക്കാതെ അഷിത പിടിച്ച് നിര്‍ത്തിയെങ്കിലും നിര്‍ണായകമായ ഒരു റണ്‍ ന്യൂസിലന്‍ഡ് ഒരുവിധം പൂര്‍ത്തിയാക്കുകയായിരുന്നു.