തിരുവനന്തപുരം: വന്ദേഭാരത് എക്‌സ്പ്രസിലെ പ്രഭാത ഭക്ഷണത്തില്‍ നിന്നും പാറ്റയെ കിട്ടിയതായി പരാതി. കഴിഞ്ഞ ദിവസം പുലര്‍ച്ചെ തിരുവനന്തപുരത്ത് നിന്നും കാസര്‍ഗോഡേക്ക് പുറപ്പെട്ട ട്രെയിനിലെ ഭക്ഷണത്തില്‍ നിന്നാണ് യാത്രക്കാരന് പാറ്റയെ ലഭിച്ചത്. പ്രഭാത ഭക്ഷണത്തോടൊപ്പം ലഭിച്ച മുട്ടക്കറിയിലാണ് പാറ്റയെ കണ്ടത്. കോഴിക്കോട് സ്വദേശി മുരളി മേനോനാണ് പരാതിയുമായി രംഗത്തെത്തിയത്. എറണാകുളത്ത് നിന്നാണ് ഇയാള്‍ ട്രെയിനില്‍ കയറിയത്.

ഭക്ഷണത്തിന്റെ ദൃശ്യങ്ങള്‍ ഇദ്ദേഹം സോഷ്യല്‍ മീഡിയയില്‍ പങ്കുവെച്ചിട്ടുണ്ട്. 'വന്ദേഭാരതിലെ നോണ്‍ വെജ് പ്രഭാത ഭക്ഷണമാണിത്. അക്ഷരാര്‍ഥത്തില്‍ അത് നോണ്‍വെജ് ആയിരുന്നു' എന്ന അടിക്കുറിപ്പോടെ മുട്ടക്കറിയില്‍ പാറ്റ കിടക്കുന്ന ഫോട്ടോയാണ് മുരളി ഫേസ്ബുക്കില്‍ പോസ്റ്റ് ചെയ്തത്. 

ഭക്ഷണം കഴിക്കാനായി പായ്ക്കറ്റ് തുറന്നോപ്പാഴാണ് മുട്ടക്കറിയില്‍ ചത്ത പാറ്റയെ കണ്ടെത്തിയത്. ഉടന്‍ തന്നെ സംഭവം കാറ്ററിങ് വിഭാഗത്തെ അറിയിച്ചു. പരാതിപ്പെട്ടതോടെ കാറ്ററിങ് ജീവനക്കാരന്‍ ക്ഷമ ചോദിച്ച് തടിയൂരുകയായിരുന്നു. സംഭവത്തില്‍ കണ്‍സ്യൂമര്‍ കോടതിയില്‍ പരാതി നല്‍കാനാണ് പരാതിക്കാരന്റെ തീരുമാനം. 

അതേസമയം ഇതാദ്യമായല്ല വന്ദേഭാരത് ട്രെയിനുകളിലെ ഭക്ഷണത്തിനെതിരെ പരാതി ഉയരുന്നത്. കഴിഞ്ഞ വര്‍ഷം മധ്യപ്രദേശിലെ ഗ്വാളിയോറില്‍ വന്ദേഭാരത് ട്രെയിനിലെ ഭക്ഷണത്തില്‍ നിന്നും പാറ്റയെ കണ്ടെത്തിയത് വലിയ വിമര്‍ശനങ്ങള്‍ക്ക് വഴിവെച്ചിരുന്നു.