അടിമാലി: ഇടുക്കി അടിമാലിയില്‍  70കാരിയെ കൊലപ്പെടുത്തിയ കേസില്‍ പ്രതികള്‍ അറസ്റ്റില്‍. കൊല്ലം സ്വദേശികളായ അലക്‌സ്, കവിത എന്നിവരാണ് പിടിയിലായത്. പാലക്കാട് നിന്നാണ് പ്രതികളെ കസ്റ്റഡിയിലെടുത്തത്. സി.സി.ടി.വി കേന്ദ്രീകരിച്ചുള്ള അന്വേഷണമാണ് പ്രതികളെ കുടുക്കിയത്. 

ഇന്നലെ രാത്രിയാണ് ഇടുക്കി അടിമാലി സ്വദേശി ഫാത്തിമ കാസിം (70) വീട്ടിനുള്ളില്‍ കൊല്ലപ്പെട്ട നിലയില്‍ കണ്ടെത്തിയത്. വൈകീട്ട് വീട്ടിലെത്തിയ മകന്‍ സുബൈറാണ് ഉമ്മയെ മരിച്ച നിലയില്‍ കണ്ടത്. രക്തം വാര്‍ന്ന നിലയില്‍ മുറിക്കുള്ളില്‍ കിടക്കുന്ന നിലയിലായിരുന്നു മൃതദേഹം. മൃതദേഹത്തിന് സമീപം മുളകുപൊടി വിതറിയ നിലയിലായിരുന്നു.

കഴുത്തിന് മുറിവേല്‍പ്പിച്ചാണ് പ്രതികള്‍ വൃദ്ധയെ കൊലപ്പെടുത്തിയത്. വീടിനുള്ളില്‍ മോഷണ ശ്രമം നടന്നതായി അന്വേഷണ സംഘം ആദ്യമേ സംശയിച്ചിരുന്നു. ഫാത്തിമയുടെ സ്വര്‍ണ മാലയടക്കം നഷ്ടപ്പെട്ടിരുന്നു. തുടര്‍ന്ന് വാടകക്ക് വീട് അന്വേഷിച്ചെത്തിയവരെ കേന്ദ്രീകരിച്ച് നടത്തിയ അന്വേഷണത്തിനൊടുവിലാണ് പാലക്കാട് വെച്ച് പ്രതികളെ പിടികൂടിയത്.