തിരുവനന്തപുരം: 15ാം കേരള നിയമസഭയുടെ ആദ്യസമ്മേളനം 24,25 തിയതികളില്‍ വിളിച്ചുചേര്‍ക്കാന്‍ ഇന്നലെ ചേര്‍ന്ന ആദ്യ മന്ത്രിസഭാ യോഗം തീരുമാനിച്ചു. 24ന് എം.എല്‍.എമാര്‍ സത്യപ്രതിജ്ഞ ചെയ്യും. 25ന് സ്പീക്കറെ തെരഞ്ഞെടുക്കും. കുന്ദമംഗലം എല്‍.എല്‍.എ അഡ്വ. പി.ടി.എ റഹീമിനെ പ്രോടേം സ്പീക്കറായി നിയമിക്കാനും മന്ത്രിസഭാ യോഗം ശുപാര്‍ശ ചെയ്തു. പ്രോടേം സ്പീക്കര്‍ക്ക് മുന്നിലാവും നിയമസഭാംഗങ്ങള്‍ സത്യപ്രതിജ്ഞ ചെയ്യുക. നിയമസഭാ സെക്രട്ടറി നടപടി ക്രമങ്ങള്‍ അംഗങ്ങളെ അറിയിച്ച ശേഷമാണ് സത്യപ്രതിജ്ഞാ ചടങ്ങുകള്‍. അക്ഷരമാലാ ക്രമത്തിലാവും നിയുക്ത അംഗങ്ങള്‍ സത്യപ്രതിജ്ഞ ചെയ്യുക. നിയമസഭയിലെ ഇരിപ്പിടത്തിന്റെ അടിസ്ഥാനത്തിലാവും സ്പീക്കര്‍ തെരഞ്ഞെടുപ്പില്‍ വോട്ട് രേഖപ്പെടുത്തുക.