ശ്രീനഗര്‍: കശ്മിരില്‍ അധ്യാപകനെ സൈന്യം മര്‍ദിച്ചു കൊന്നതാണെന്ന് റിപ്പോര്‍ട്ട്. ശ്രീനഗറില്‍ നിന്നു 40 കിലോമീറ്റര്‍ അകലെയാണ് സംഭവം നടന്നത്. ഷബീര്‍ അഹമദ് മാംഗു(32) എന്ന സര്‍ക്കാര്‍ സ്‌കൂള്‍ അധ്യാപകനാണ് കൊല്ലപ്പെട്ടത്. സംഘര്‍ഷത്തിനിടെ  ഒരു ഗ്രാമത്തില്‍ നടന്ന തെരച്ചിലിനിടെ സൈനികര്‍ അധ്യാപകനെയും മറ്റു ചിലരെയും മര്‍ദിക്കുകയായിരുന്നു. വടക്കന്‍ ആര്‍മി കമാന്‍ഡര്‍ ലെഫ്റ്റനന്റ് ജനറല്‍ ഡി.എസ് ഹൂഡ് ആണ് ഇക്കാര്യം വ്യക്തമാക്കിയത്. സംഭവത്തെ ന്യായീകരിക്കാനും അംഗീകരിക്കാനും കഴിയാത്തതാണെന്നു ആര്‍മി കമാന്‍ഡര്‍ പ്രതികരിച്ചു. സൈനികര്‍ തങ്ങളെ മര്‍ദിച്ചതായും വീടിന്റെ ഗ്ലാസുകള്‍ തകര്‍ത്തുവെന്നും അധ്യാപകന്റെ ബന്ധുക്കള്‍ പറഞ്ഞു. മര്‍ദനത്തില്‍ അന്‍പതോളം പേര്‍ക്ക് പരുക്കേറ്റിരുന്നു.