ന്യൂഡൽഹി
രാജ്യത്തെ വിദ്യാഭ്യാസ സ്ഥാപനങ്ങളിൽ വിദ്യാർഥികൾക്കെതിരായ ലൈംഗികാതിക്രമങ്ങളും മറ്റു പീഡനങ്ങളും തടയുന്നതിന് മാർഗരേഖ ഒരുക്കാൻ സുപ്രിംകോടതി.
മാർഗരേഖ തേടിയുള്ള ഹരജിയിൽ കേന്ദ്ര-സംസ്ഥാന സർക്കാരുകളുടെ നിലപാട് തേടി കോടതി നോട്ടിസ് അയച്ചു. തമിഴ് ദ്വൈവാരികയായ നക്കീരൻ്റെ എഡിറ്റർ നക്കീരൻ ഗോപാൽ സമർപ്പിച്ച ഹരജിയിൽ ജസ്റ്റിസുമാരായ ഇന്ദിരാബാനർജി, സി.ടി രവികുമാർ എന്നിവരടങ്ങിയ ബെഞ്ചാണ് കേന്ദ്രത്തിനും സംസ്ഥാനങ്ങൾക്കും നോട്ടിസയച്ചത്. സ്‌കൂളുകൾ കുട്ടികളുടെ സുരക്ഷിത കേന്ദ്രങ്ങളായിരിക്കണമെന്നാണ് കാഴ്ചപ്പാടെങ്കിലും രാജ്യത്തെ സാഹചര്യം അങ്ങനെയല്ലെന്ന് ഹരജിയിൽ ചൂണ്ടിക്കാട്ടുന്നു.
സ്‌കൂളുകളിൽ കുട്ടികൾക്കെതിരേ നടക്കുന്ന അതിക്രമങ്ങൾ കൂടുകയാണ്. കുട്ടികൾ പലതരത്തിലുള്ള അതിക്രമങ്ങൾക്ക് വിധേയരാകുന്നു.
അവരുടെ മനുഷ്യാവകാശം ലംഘിക്കപ്പെടുന്നു. ഇത് തടയുന്നതിന് നിലവിൽ മാർഗരേഖയൊന്നുമില്ല. ഓൺലൈൻ വിദ്യാഭ്യാസംകൂടി വന്ന കാലമായതിനാൽ കുട്ടികൾ ഓൺലൈനായും ഓഫ് ലൈനായും ചൂഷണത്തിന് ഇരയാകുന്ന സാഹചര്യവും സംജാതമായിട്ടുണ്ട്. നിയമവിരുദ്ധവും അപകടകരവുമായ പ്രവർത്തനങ്ങൾ പ്രോത്സാഹിപ്പിക്കുന്നതിനുള്ള ഉപകരണങ്ങളായി മാറാൻ കുട്ടികളെ നിർബന്ധിക്കുന്ന സാഹചര്യവുമുണ്ടാകാം. വിദ്യാഭ്യാസ സ്ഥാപനങ്ങളിൽ കുട്ടികളുടെ മൗലികാവകാശങ്ങൾ സംരക്ഷിക്കപ്പെടുന്നുവെന്ന് ഉറപ്പാക്കേണ്ടതുണ്ട്.
കുട്ടികൾ ലൈംഗികാതിക്രമത്തിനിരയാകാതെ സംരക്ഷിക്കപ്പെടണം. കുട്ടികളുടെ അന്തസും ഭരണഘടന ഉറപ്പു നൽകിയ 21ാം വകുപ്പ് പ്രകാരമുള്ള അവകാശമാണ്. കുട്ടികൾക്കുള്ള സുരക്ഷിതമായ വിദ്യാഭ്യാസം സംസ്ഥാന സർക്കാരുകളുടെ ഉത്തരവാദിത്വമാണ്. വിദ്യാഭ്യാസ സ്ഥാപനത്തിന്റെ ഭാഗത്തുനിന്നുണ്ടാകുന്ന ഏതൊരു വീഴ്ചയും സംസ്ഥാന സർക്കാരിന്റെ വീഴ്ചയായി കണക്കാക്കും. അതിനാൽ, അതത് സംസ്ഥാനങ്ങളിലെ കുട്ടികളുടെ ക്ഷേമത്തിനും സംരക്ഷണത്തിനും നിയമം നടപ്പാക്കാൻ സംസ്ഥാന സർക്കാരിന് ബാധ്യതയുണ്ടെന്നും ഹരജിയിൽ ചൂണ്ടിക്കാട്ടുന്നു.