കുറ്റ്യാടി: സര്‍ക്കാര്‍ ഓഫിസുകളില്‍ നിലവിലുള്ള ഒഴിവുകള്‍ യഥാസമയം റിപ്പോര്‍ട്ട് ചെയ്യാത്തത് ഉദ്യോഗാര്‍ഥികള്‍ക്കു തിരിച്ചടിയാവുന്നു. പാര്‍ട്ട്‌ടൈം സ്വീപ്പര്‍ പോസ്റ്റ് ഉള്‍പ്പെടെയുള്ള ഒഴിവുകള്‍ എംപ്ലോയ്‌മെന്റ് എക്‌സ്‌ചേന്‍ജുകള്‍ക്കു കൃത്യമായി റിപ്പോര്‍ട്ട് ചെയ്യാത്തതു കാരണം കാലങ്ങളായി പേര് രജിസ്റ്റര്‍ ചെയ്തു നിയമനം കാത്തുകഴിയുന്നവരാണു വെട്ടിലാവുന്നത്.
അതേസമയം, എംപ്ലോയ്‌മെന്റ് ഓഫിസുകളെ നോക്കുകുത്തിയാക്കി ഇത്തരം ഒഴിവുകളിലേക്കു താല്‍കാലിക നിയമനം നടത്തുന്നതും പതിവാണ്. അന്‍പതു വയസു വരെയുള്ളവര്‍ക്ക് എംപ്ലോയ്‌മെന്റ് വഴി പാര്‍ട്ട്‌ടൈം ജോലികള്‍ക്ക് അര്‍ഹതയുണ്ടെന്നിരിക്കെ ഇവര്‍ക്കുള്ള അവസരമാണ് അധികൃതരുടെ അനാസ്ഥ കാരണം നഷ്ടപ്പെടുന്നത്.
വടകര താലൂക്കിലെ നിരവധി സര്‍ക്കാര്‍ ഓഫിസുകളില്‍ നൂറിലേറെ ഒഴിവുകളുണ്ടായിട്ടും ഒന്നുപോലും എംപ്ലോയ്‌മെന്റ് ഓഫിസില്‍ അറിയിക്കുന്നില്ലെന്ന പരാതിയുണ്ട്. ഇവിടങ്ങളിലെല്ലാം താല്‍ക്കാലിക നിയമനവും തകൃതിയാണ്.