കോഴിക്കോട്: തായ്‌ലന്‍ഡ് ഓപ്പണ്‍ ഫെന്‍സിങ് ചാംപ്യന്‍ഷിപ്പില്‍ പങ്കെടുക്കാന്‍ യോഗ്യത നേടിയ എന്‍ അമല്‍ലാലിന് ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റിയുടെ ധനസഹായം കൈമാറി. അമലിന്റെ ജന്മനാടായ കയ്യടിത്തോടില്‍ യാത്രയയപ്പ് ചടങ്ങില്‍ സ്‌പോര്‍ട്‌സ് കൗണ്‍സില്‍ സംസ്ഥാന പ്രസിഡന്റ് ടി.പി ദാസനാണ് അര ലക്ഷം രൂപയുടെ ചെക്ക് കൈമാറിയത്.
സെപ്റ്റംബര്‍ 16 മുതല്‍ 20 വരെ ബാങ്കോക്കില്‍ നടക്കുന്ന ചാംപ്യന്‍ഷിപ്പില്‍ പങ്കെടുക്കാന്‍ യോഗ്യത നേടിയിട്ടും പണമില്ലാത്തിനാല്‍ പോകാന്‍ കഴിയാത്ത അമല്‍ലാലിനെക്കുറിച്ച് മാധ്യമങ്ങള്‍ വാര്‍ത്ത നല്‍കിയിരുന്നു. വാര്‍ത്ത കണ്ടാണ് യു.എല്‍.സി.സി.എസും അമലിന് സഹായവുമായെത്തിയത്.
ബേപ്പൂര്‍ നടുവട്ടം കയ്യടിത്തോട് നാങ്ങനാടത്ത് എന്‍ ലാലുവിന്റെയും സുബീനയുടെയും മകനായ അമല്‍ലാല്‍ കല്‍പ്പറ്റ എസ്.കെ.എം.ജെ എച്ച്.എസ്.എസിലെ ഒന്‍പതാം ക്ലാസ് വിദ്യാര്‍ഥിയാണ്.
ജനകീയ കമ്മിറ്റി നേതൃത്വത്തില്‍ നടന്ന ചടങ്ങില്‍ കൗണ്‍സിലര്‍ പൊന്നത്ത് ഷൈമ അധ്യക്ഷയായി. കൗണ്‍സിലര്‍ പേരോത്ത് പ്രകാശന്‍, അഡ്വ. എടത്തൊടി രാധാകൃഷ്ണന്‍, ജിജേഷ്, റിജീഷ്, വാഹിദ്, സാബിത്ത്, ജിജോ ജോര്‍ജ്, അമല്‍ലാല്‍ സംസാരിച്ചു. കെ രാജീവ് സ്വാഗതവും റനീഷ് പുനത്തില്‍ നന്ദിയും പറഞ്ഞു.