ഏഥര്‍ 450 എക്‌സിന്റെ പുതിയ വേരിയന്റ് ഇന്ത്യന്‍ വിപണിയിലെത്തി. ഉത്സവ സീസണ്‍ മുന്നില്‍ കണ്ട് വിപണിയിലെത്തിച്ച 450 എക്‌സിന്റെ അടിസ്ഥാന മോഡലിന് 98,079 രൂപയാണ് വില. പുതുതായി ഇറങ്ങിയ അടിസ്ഥാന മോഡലിന് പഴയ മോഡലുകളെ അപേക്ഷിച്ച് ഒരു റൈഡ് മോഡ് മാത്രമാണുള്ളത്. റൈഡ് മോഡിലെ മാറ്റങ്ങള്‍ ഒഴിച്ചു നിര്‍ത്തിയാല്‍ സ്‌കൂട്ടറിന്റെ കരുത്തിനും പവര്‍ ട്രെയിനിലും മുന്‍ മോഡലിനെ അപേക്ഷിച്ച് കാര്യമായ വ്യത്യാസങ്ങളൊന്നും ഉണ്ടായിട്ടില്ല.

ഒറ്റത്തവണ ചാര്‍ജ് ചെയ്താല്‍ 146 കിലോമീറ്റര്‍ വരെ പോകാന്‍ സാധിക്കുന്ന വാഹനത്തിന് പൂജ്യത്തില്‍ നിന്നും നൂറ് കിലോമീറ്ററിലേക്കെത്താന്‍ വെറും 3.3 സെക്കന്റ് സമയം മാത്രമാണ് ആവശ്യം. മുന്‍ മോഡലിന് ഉണ്ടായിരുന്ന 3.7 കിലോ വാട്ട് ബാറ്ററി പായ്ക്ക്, 6.4 കിലോവാട്ട് ഉയര്‍ന്ന പവര്‍, 26എന്‍.എം ടോര്‍ക്ക് തുടങ്ങി മുന്‍ മോഡലിലുള്ള ഘടകങ്ങളെല്ലാം ഏഥര്‍ 450 എക്‌സിന്റെ പുതിയ വേരിയന്റിനുണ്ട്.

ബേസിക്ക് വേരിയെന്റിന് പുറമെ പ്രോപാക്ക് വേര്‍ഷനും ലഭ്യമാണ്. 30,000 രൂപ അധികം നല്‍കിയാല്‍ ലഭിക്കൂന്ന പ്രോപാക്ക് വേര്‍ഷനില്‍ ജി.പി.എസ് നാവിഗേഷന്‍, റൈഡ് മോഡുകള്‍, ബ്ലൂടൂത്ത് കണക്ടിവിറ്റി, ലൈവ് ട്രാക്കിങ്, ഹില്‍ ഹോള്‍ഡ് അസിസ്റ്റന്റ്, പാര്‍ക്ക് അസിസ്റ്റന്റ്, തുടങ്ങിയ സൗകര്യങ്ങളെല്ലാം ലഭ്യമാണ്.

മൂന്ന് വര്‍ഷമോ 30,000 കിലോമീറ്ററോ ആണ് ഏഥര്‍ നല്‍കുന്ന വാറന്റി. അഞ്ച് വര്‍ഷമോ 60,000 കിലോമീറ്ററോയാണ് പ്രോപാക്കിന് ലഭിക്കുന്ന വാറന്റി.