സ്വന്തം ലേഖകന്‍
കൊച്ചി
കേരള വിദ്യാഭ്യാസ ചട്ടത്തില്‍ സര്‍ക്കാര്‍ കൊണ്ടുവന്ന ഭേദഗതികള്‍ നടപ്പാക്കുന്നത് ഹൈക്കോടതി ഒരു മാസത്തേക്ക് തടഞ്ഞു. ഏപ്രില്‍ 18ന് കൊണ്ടുവന്ന ഭേദഗതി വ്യവസ്ഥകളില്‍ ഹരജിക്കാരുടെ വാദത്തില്‍ പ്രഥമദൃഷ്ട്യാ വസ്തുതയുണ്ടെന്ന് വിലയിരുത്തിയാണ് ഇവ നടപ്പാക്കുന്നത് സിംഗിള്‍ ബെഞ്ച് തടഞ്ഞത്.
സര്‍ക്കാര്‍ കൊണ്ടുവന്ന ഭേദഗതികള്‍ വിദ്യാഭ്യാസ അവകാശ നിയമത്തിലെ വ്യവസ്ഥകള്‍ക്ക് വിരുദ്ധമാണെന്ന് ചൂണ്ടിക്കാട്ടി പ്രൈവറ്റ് സ്‌കൂള്‍ (എയ്ഡഡ്) മാനേജേഴ്‌സ് അസോസിയേഷന്‍ സംസ്ഥാന ജനറല്‍ സെക്രട്ടറിയും കൊല്ലം ചെറിയ വെളിനല്ലൂര്‍ കെ.പി.എം.എച്ച്.എസ്.എസ് മാനേജരുമായ കെ. മണി ഉള്‍പ്പെടെ നല്‍കിയ ഹരജിയില്‍ ജസ്റ്റിസ് രാജ വിജയരാഘവനാണ് ഉത്തരവ് നല്‍കിയത്.
വിദ്യാര്‍ഥികള്‍ക്ക് നിര്‍ബന്ധമായും ലഭ്യമാക്കേണ്ട അധ്യയന ദിനങ്ങള്‍ വെട്ടിക്കുറച്ചതടക്കമുള്ള നിയമഭേദഗതിക്കാണ് സ്റ്റേ. കേന്ദ്ര വിദ്യാഭ്യാസ അവകാശ നിയമത്തിലെ വ്യവസ്ഥകളും പ്രധാനാധ്യാപകരുടെയടക്കം ചുമതലകളും പരിഗണിക്കാതെയാണ് ഇത് നടപ്പിലാക്കുന്നത്. 15 ദിവസത്തില്‍ കൂടുതല്‍ ഹാജരാകാത്ത കുട്ടികളെ ഒഴിവാക്കിയില്ലെങ്കില്‍ ക്ലാസ് അധ്യാപകര്‍ക്കും പ്രധാനാധ്യാപകർക്കും ഇതിൻ്റെ ബാധ്യത നിശ്ചയിച്ചാണ് സര്‍ക്കാരിന്റെ ഭേദഗതി. ഇതു വിദ്യാഭ്യാസ അവകാശലംഘനമാണെന്ന് ചൂണ്ടിക്കാട്ടിയാണ് ഹരജിക്കാര്‍ കോടതിയെ സമീപിച്ചത്.
കേന്ദ്ര വിദ്യാഭ്യാസ അവകാശ നിയമപ്രകാരം 220 അധ്യയന ദിവസങ്ങളും 1,000 അധ്യയന മണിക്കൂറും നിര്‍ബന്ധമാണ്. എന്നാല്‍, കുട്ടികൾ കൂടുന്നത് കാരണം പുതിയതായി വരുന്ന തസ്തികളിലേക്ക് ഒക്ടോബർ ഒന്നിന് ശേഷം മാത്രമേ കെ.ഇ.ആർ ചട്ട ഭേദഗതി പ്രകാരം നിയമനം നടക്കൂ.ഇത് ഒരു വിഭാഗം വിദ്യാര്‍ഥികള്‍ക്ക് ജൂണ്‍ മുതല്‍ സെപ്റ്റംബര്‍ 30 വരെ നാലു മാസത്തെ അധ്യയന ദിവസങ്ങള്‍ തടസപ്പെടുത്തുമെന്നും ഹരജിയിൽ പറയുന്നു.

ഒന്നു മുതല്‍ എട്ടു വരെയുള്ള ക്ലാസുകളിലെ കുട്ടികളെ സ്‌കൂളില്‍നിന്ന് നീക്കം ചെയ്യാന്‍ അധ്യാപകര്‍ക്കോ പ്രധാനാധ്യാപകര്‍ക്കോ അധികാരമില്ല. എന്നിരിക്കെ അപ്രകാരം ചെയ്യാതിരുന്നാലുള്ള സാമ്പത്തിക ബാധ്യത അധ്യാപകര്‍ വഹിക്കണമെന്നാണ് മറ്റൊരു ഭേദഗതി.
സ്കൂൾ പ്രവേശനമടക്കുള്ള കാര്യങ്ങൾ പ്രധാനാധ്യാപകരുടെയും മറ്റും ചുമതലയാണെന്നിരിക്കെ കുട്ടികള്‍ ഹാജരാകാതിരുന്നാലുള്ള സാമ്പത്തിക ബാധ്യത മാനേജരുടെ തലയില്‍ കെട്ടിവയ്ക്കുന്ന രീതിയിലുള്ള ചട്ടഭേദഗതി നിയമവിരുദ്ധമാണെന്നും ഹരജിയില്‍ ചൂണ്ടിക്കാട്ടുന്നുണ്ട്. എന്നാല്‍, വ്യാജമായി കുട്ടികളുടെ എണ്ണം പെരുപ്പിച്ചുകാട്ടി അധിക ബാച്ചുകള്‍ വാങ്ങുന്നത് ഒഴിവാക്കാനാണ് ഈ വ്യവസ്ഥകള്‍ കൊണ്ടുവന്നതെന്ന് സര്‍ക്കാര്‍ വിശദീകരിച്ചു. ഹരജി സര്‍ക്കാരിന്റെ വിശദീകരണം തേടി ജൂണ്‍ 10ലേക്ക് മാറ്റി.