ദമ്മാം: സോഷ്യല്‍ മീഡിയയില്‍ ട്രോളര്‍മാര്‍ക്ക് കിട്ടിയ പുതിയ ആയുധമായ ഋഷിരാജ് സിംഗിന്റെ പുതിയ പ്രസ്താവന അറബ് ലോകത്തും ചര്‍ച്ചയാവുന്നു. സഊദി അറേബ്യയിലെ  പ്രധാന പ്രാദേശിക പത്രത്തിലാണ് സിംഗിന്റെ പുതിയ പ്രസ്താവന വന്നിരിക്കുന്നത്. സ്ത്രീകളെ 14 സെക്കന്റ് നോക്കുന്നതിനെക്കുറിച്ചുള്ള ഋഷിരാജ് സിംഗിന്റെ വിവാദ പ്രസ്താവനയാണ് പ്രമുഖ സഊദി ദിനപത്രമായ 'ഉക്കാളിലും' വാര്‍ത്തയായത്
          'ഇന്ത്യയില്‍ സ്ത്രീകളെ 14 സെക്കന്റില്‍ കൂടുതല്‍ നോക്കുന്നത് കുറ്റകരം..! 'എന്ന തലക്കെട്ടോടെയാണു ഓണ്‍ലൈനിലും അച്ചടി പത്രത്തിലും കഴിഞ്ഞ ദിവസം പ്രസിദ്ധീകരിച്ചത്. കൊച്ചിയില്‍  നടന്ന ഒരു പരിപാടിയില്‍ നടത്തിയ പ്രസംഗത്തില്‍ സ്വയം രക്ഷക്കായി സ്ത്രീകള്‍ മുളക് പൊടിയും കത്തിയും കരുതണമെന്ന് പറഞ്ഞതും വാര്‍ത്തയിലുണ്ട്.
         ഇന്ത്യയിലും ഇത് പോലോത്ത നിയമങ്ങള്‍ പ്രാവര്‍ത്തികമാക്കുന്നുവോ എന്നതാണ് വാര്‍ത്ത വായിച്ച സ്വദേശി പൗരന്മാര്‍ക്ക് സംശയം. ഇത് വരെ മലയാളികള്‍ ട്രോളിയിരുന്ന പുതിയ വിവാദ പ്രസ്താവന ഇതോടെ, സോഷ്യല്‍ മീഡിയയില്‍ ട്രോളര്‍മാര്‍ക്ക് മൈലേജ് കൂടിയിരിക്കുകയാണ്