കൊട്ടിയം(കൊല്ലം): സാമൂഹികവിരുദ്ധ സംഘം ആളുമാറി ആക്രമിച്ച യുവാവ് മരിച്ചു. മെഡിക്കല്‍ കോളജില്‍ ചികിത്സയിലായിരുന്ന മുണ്ടയ്ക്കല്‍ പുതുവല്‍ പുരയിടം സുധിന്‍ വിലാസത്തില്‍ സുമേഷ്(20)ആണ് മരിച്ചത്. കഴിഞ്ഞ ഒമ്പതിന് രാത്രിയായിരുന്നു സംഭവം. സുഹൃത്തിനെ വീട്ടിലാക്കി മടങ്ങിവരുന്ന സുമേഷിനെ താന്നി പാലത്തിനു സമീപത്ത് സംഘം ക്രൂരമായി മര്‍ദിക്കുകയായിരുന്നു. ബഹളം കേട്ട് പ്രദേശവാസികള്‍ എത്തിയതോടെ സംഘം കടന്നുകളഞ്ഞു. സ്‌കൂള്‍ വിദ്യാര്‍ഥിനിയെ ശല്യം ചെയ്തതുമായി ബന്ധപ്പെട്ടുണ്ടായ തര്‍ക്കത്തില്‍ ആളുമാറിയാണ് സുമേഷിനെ ആക്രമിച്ചതെന്ന് ഇരവിപുരം പൊലിസ് പറഞ്ഞു.
പെണ്‍കുട്ടിയെ ശല്യം ചെയ്തവരെ വാളത്തുംഗല്‍ സ്വദേശികളായ യുവാക്കള്‍ ചോദ്യംചെയ്തിരുന്നു. ഇതിന് പ്രതികാരം ചെയ്യാന്‍ വരുകയാണെന്ന് തെറ്റിദ്ധരിച്ചാണ് സുമേഷിനെയും സുഹൃത്തിനെയും എട്ടോളം പേരടങ്ങുന്ന സംഘം ആക്രമിച്ചത്.  ഇന്നലെ രാവിലെ എട്ട് മണിയോടെയായിരുന്നു മരണം. സുധിന്‍, സുധീഷ് എന്നിവര്‍ സഹോദരങ്ങളാണ്. പിതാവ് സുന്ദരന്‍, മാതാവ് സുഷമ.
സംഭവത്തില്‍ ആറ് പേരെ  ഇരവിപുരം പൊലിസ് അറസ്റ്റ് ചെയ്തിരുന്നു. ഇവരുടെ പേരില്‍  കൊലക്കുറ്റവും ചുമത്തിയിട്ടുണ്ട്.