പാലക്കാട്: നെന്മാറയില്‍ യുവതിയെ പത്ത് വര്‍ഷം ഒളിപ്പിച്ച് താമസിപ്പിച്ച സംഭവം അവിശ്വസിനീയമെന്ന് വനിതാ കമ്മിഷന്‍. പത്ത് വര്‍ഷക്കാലം ഒരു സ്ത്രീയെ ബന്ധനത്തില്‍ ആക്കുകയാണ് ചെയ്തത്. കുടുസുമുറിയില്‍ 10 കൊല്ലം സുരക്ഷിതമായി ഇരുന്നു എന്നത് അംഗീകരിക്കാനാവില്ല. സമൂഹത്തില്‍ തെറ്റായ മാതൃകകള്‍ ഉണ്ടാകാന്‍ പാടില്ലെന്നാണ് വനിതാ കമ്മീഷന്‍ കരുതുന്നതെന്നും വനിതാ കമ്മീഷന്‍ അധ്യക്ഷ എംസി ജോസഫൈന്‍ പറഞ്ഞു. സജിതയെ പാര്‍പ്പിച്ചിരുന്ന വീട് സന്ദര്‍ശിച്ച ശേഷം മാധ്യമ പ്രവര്‍ത്തകരോട് സംസാരിക്കുകയായിരുന്നു അവര്‍.

കേരളത്തിലാദ്യമായാണ് ഇങ്ങനെയൊരു സംഭവം റിപ്പോര്‍ട്ട് ചെയ്യുന്നത്. റഹ്മാനോടും സജിതയോടും സംസാരിച്ചു. പ്രയാസങ്ങളെന്തെങ്കിലും ഉണ്ടെന്ന് അവര്‍ സമ്മതിക്കുന്നില്ല. സന്തുഷ്തരാണെന്നാണ് പറയുന്നത്.

പത്ത് വര്‍ഷം മുന്‍പ് സജിതയെ കാണാതായതില്‍ കൃത്യമായ അന്വേഷണം പൊലീസ് നടത്തിയില്ലെന്നാണ് കരുതുന്നത്. ഇരുവരുടെയും തുടര്‍ ജീവിതം കമ്മിഷന്‍ വീക്ഷിക്കും. കേസില്‍ ക്രൈം ബ്രാഞ്ച് അന്വേഷണം തുടരുകയാണെന്നും കമ്മിഷന്‍ പ്രതിനിധികള്‍ പറഞ്ഞു. സജിത, റഹ്മാന്‍, റഹ്മാന്റെ മാതാപിതാക്കള്‍ എന്നിവരുടെ മൊഴിയും വനിതാ കമ്മിഷന്‍ രേഖപ്പെടുത്തി.