ചോദിച്ച തുക നല്‍കിയില്ല; പിരിവിനെത്തിയ സി.പി.ഐ പ്രവര്‍ത്തകര്‍ വ്യാപാരിയെ മര്‍ദിച്ചതായി പരാതി

തിരുവനന്തപുരം: ചോദിച്ച തുക നല്‍കാത്തതിന് ഫണ്ട് പിരിവിനെത്തിയ സി.പി.ഐ പ്രവര്‍ത്തകര്‍ വ്യാപാരിയെ മര്‍ദിച്ചതായി പരാതി. പോത്തന്‍കോട് ജങ്ഷനില്‍ കട നടത്തുന്ന മാരിയപ്പന്‍ (60) ന് മര്‍ദനമേറ്റെന്നാണ് പരാതി. കഴിഞ്ഞ വെള്ളിയാഴ്ച വൈകിട്ട് എം. എന്‍ സ്മാരക നവീകരണ ഫണ്ട് പിരിക്കാനെത്തിയ സി.പി.ഐ മേഖലാ ജനറല്‍ സെക്രട്ടറി ഉള്‍പ്പെടുന്ന സംഘത്തിനെതിരേയാണ് പരാതി ഉയര്‍ന്നിരിക്കുന്നത്. ആവശ്യപ്പെട്ട തുക നല്‍കാന്‍ കഴിയില്ലെന്നും 50 രൂപയേ തരാന്‍ നിവൃത്തിയുള്ളൂ എന്നും പറഞ്ഞതിന് ഇരുചെകിട്ടത്തും അടിച്ചുവെന്നും കടയിലെ സാധനങ്ങള്‍ തട്ടിത്തെറിപ്പിച്ചുവെന്നും പരാതിയില്‍ പറയുന്നു. പോത്തന്‍കോട് പൊലിസ് കേസെടുത്തു.