മുള്ളൂര്‍ക്കര: ചെമ്പന്‍പടി കുറുമ്പലഞ്ചേരി ക്ഷേത്ര പരിസരത്തെ ആളൊഴിഞ്ഞ പറമ്പില്‍ നിന്ന് വടക്കാഞ്ചേരി പൊലിസ് വാഷ് ശേഖരവും, അനുബന്ധ സാമഗ്രികളും പിടികൂടി. ഓണ വിപണി ലക്ഷ്യമിട്ട് തയാറാക്കിയിരുന്ന വ്യാജ ചാരായത്തിന്റെ അസംസ്‌കൃത വസ്തുക്കളും പിടിച്ചെടുത്തു. സി.ഐ ടി.എസ് സിനോജിന് ലഭിച്ച രഹസ്യ സന്ദേശത്തെ തുടര്‍ന്ന് എസ്.ഐ സുധീഷ്‌മോന്‍, എ.എസ്.ഐ ബാബു എന്നിവരുടെ നേതൃത്വത്തില്‍ നടന്ന പരിശോധനയിലാണ് വാഷും, വാറ്റുപകരണങ്ങളും പിടികൂടിയത്. ആരേയും പിടികൂടാനായിട്ടില്ല. ഓടി രക്ഷപ്പെട്ട പ്രതിയെ കുറിച്ച് വ്യക്തമായ സൂചനകള്‍ ലഭിച്ചതായും പരിശോധന തുടരുമെന്നും പൊലിസ് അറിയിച്ചു. ഈ മേഖലയില്‍ ചാരായ വാറ്റ് നടക്കുന്നതായി പരാതി ഉണ്ടായിരുന്നു.