കൊളംബോ: ശ്രീലങ്കയില്‍ പ്രക്ഷോഭത്തിന് അയവില്ല. അടിയന്തരാവസ്ഥ പ്രഖ്യാപിച്ചതിനു പിന്നാലെ രാജ്യത്തെ സംഘര്‍ഷ സാധ്യതയുള്ള മേഖലകളില്‍ കര്‍ഫ്യൂ പ്രഖ്യാപിച്ചിരിക്കുകയാണ്.

രാജ്യത്ത് സമാധാനം പുനഃസ്ഥാപിക്കുന്നതിനായി കലാപകാരികളെ അറസ്റ്റ് ചെയ്യാന്‍ സൈന്യത്തിനും പൊലിസിനും ഉത്തരവ് നല്‍കിയതായും ആക്ടിങ് പ്രസിഡന്റിന്റെ ചുമതലയുള്ള പ്രധാനമന്ത്രി റനില്‍ വിക്രമസിംഗെ രാജ്യത്തെ അറിയിച്ചു. അടിയന്തരാവസ്ഥ പ്രഖ്യാപിച്ചതോടെയാണ് പ്രക്ഷോഭകര്‍ക്കെതിരെ നടപടി ശക്തമാക്കിയത്. പ്രധാനമന്ത്രിയുടെ ഓഫിസ് വളഞ്ഞ പ്രക്ഷോഭകാരികളും സൈന്യവും ഏറ്റുമുട്ടല്‍ തുടരുകയാണ്.

സമരക്കാരെ അറസ്റ്റ് ചെയ്യാന്‍ ആക്ടിങ് പ്രസിഡന്റിന്റെ ചുമതലയുള്ള പ്രധാനമന്ത്രി റെനില്‍ വിക്രമസിംഗെ നിര്‍ദേശം നല്‍കി. പ്രധാന ലങ്കന്‍ ചാനലുകള്‍ സംപ്രേഷണം നിര്‍ത്തിയിട്ടുണ്ട്. ജനങ്ങള്‍ക്കുനേരെ സൈന്യം കണ്ണീര്‍ വാതകം പ്രയോഗിച്ചു. പലയിടത്തും സംഘര്‍ഷം നിലനില്‍ക്കുകയാണ്.