ലഖ്‌നോ: ലുലുമാളില്‍ ഹനുമാന്‍ ചാലിസ ചൊല്ലിയ സംഭവത്തില്‍ രണ്ട് പേരെ അറസ്റ്റ് ചെയ്തുവെന്ന് യു.പി പൊലിസ്. മാളില്‍ കടന്നു കയറി ബഹളം സൃഷ്ടിച്ചതിന്റെ പേരില്‍ വേറെ 15 പേരെയും പൊലിസ് കസ്റ്റഡിയിലെടുത്തിട്ടുണ്ട്. ശനിയാഴ്ചയാണ് ഒരുസംഘം ലുലുമാളിനുള്ളിലേക്ക് കടന്ന് ഹനുമാന്‍ ചാലിസ ചൊല്ലിയത്.

രണ്ട് പേരെ അറസ്റ്റ് ചെയ്ത വിവരം ഡെപ്യൂട്ടി പൊലിസ് കമ്മീഷണര്‍ ഗോപാല്‍ കൃഷ്ണ ചൗധരി സ്ഥിരീകരിച്ചിട്ടുണ്ട്. രണ്ട് പേര്‍ മാളിലേക്ക് കടന്നുചെന്ന് തറയിലിരുന്ന് ഹനുമാന്‍ ചാലിസ ചൊല്ലുകയായിരുന്നു. ഇവരെ മാളിലെ സുരക്ഷ ഉദ്യോഗസ്ഥരാണ് പൊലിസിനെ ഏല്‍പ്പിച്ചത്. മാളിലേക്ക് കടക്കാന്‍ ശ്രമിച്ച മറ്റൊരു സംഘത്തെ കസ്റ്റഡിയിലെടുത്തതിന് ശേഷം പൊലിസ് വിട്ടയച്ചു.

ലുലുമാളില്‍ നിസ്‌കരിച്ചവര്‍ക്കെതിരെ 153എ( രണ്ട് വിഭാഗങ്ങള്‍ക്കിടയില്‍ ശത്രുതയുണ്ടാക്കല്‍) 295എ( മതവികാരം വ്രണപ്പെടുത്തല്‍) തുടങ്ങിയ വകുപ്പുകള്‍ പ്രകാരം പൊലിസ് കേസെടുത്തിരുന്നു. ഇതിന് പിന്നാലെയാണ് ഹനുമാന്‍ ചാലിസ ചൊല്ലിയവര്‍ക്കെതിരെയും കേസെടുത്തിരിക്കുന്നത്.