പ്ലസ് വണ്‍: 14 അധിക ബാച്ചുകള്‍ നല്‍കിയാലും മലബാറില്‍ 50000 വിദ്യാര്‍ഥികള്‍ പുറത്ത്

മലപ്പുറം: മലബാറിലെ പ്ലസ് വണ്‍ സീറ്റ് ക്ഷാമത്തിന് സര്‍ക്കാര്‍ 14 അധിക ബാച്ചുകള്‍ നല്‍കിയാലും അപേക്ഷ നല്‍കിയ അരലക്ഷത്തിലേറെ വിദ്യാര്‍ഥികള്‍ക്ക് സ്‌കൂള്‍ പ്രവേശനം സാധ്യമാകില്ല. ഇന്നലെ വരെ പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളില്‍ 2,29,695 പേരാണ് പ്ലസ് വണ്ണിന് അപേക്ഷിച്ചത്. നാളെയാണ് അപേക്ഷാ തീയതി അവസാനിക്കുന്നത്. സി.ബി.എസ്.ഇ, ഐ.സി.എസ്.ഇ സിലബസുകളില്‍ പഠിച്ചവരും വിദേശത്തു പഠിച്ചവരുമായി ആയിരക്കണക്കിനു പേര്‍ മലബാറില്‍നിന്നു മാത്രം കേരള സിലബസിലേക്ക് മാറ്റം ആഗ്രഹിച്ച് അപേക്ഷ നല്‍കിയിട്ടുണ്ട്.

മലപ്പുറത്ത് പ്ലസ് വണ്‍ അപേക്ഷകളുടെ എണ്ണം 75,062 ആയി. പാലക്കാട് 42,920, കോഴിക്കോട് 45,338, വയനാട് 11,434, കണ്ണൂര്‍ 36,065, കാസര്‍കോട് 18,876 അപേക്ഷകളാണ് ഇന്നലെവരെ ലഭിച്ചത്. ഓരോ ഹയര്‍ സെക്കന്‍ഡറി സ്‌കൂളിലും ഒരു അധിക ബാച്ച് നല്‍കുക എന്ന കാര്‍ത്തികേയന്‍ കമ്മിഷന്റെ ശുപാര്‍ശ നടപ്പിലാക്കിയാല്‍ മാത്രമാണ് നിലവില്‍ മലബാറില്‍ സീറ്റ് ക്ഷാമം പരിഹാരമാകുക. എയ്ഡഡ് സ്‌കൂളുകളുടെ സീറ്റ് പെരുപ്പിച്ചു കാണിക്കുന്ന സര്‍ക്കാര്‍ സി.ബി.എസ്.ഇ, ഐ.സി.എസ്.ഇ എന്നിവയില്‍നിന്ന് കേരള സിലബസിലേക്കുവരുന്ന കുട്ടികളെ കണ്ടില്ലെന്ന് നടിക്കുകയാണ്.

കുറവ് പരിഹരിക്കാന്‍ നല്‍കുന്നത് 1000ല്‍ താഴെ സീറ്റുകള്‍ തെക്കന്‍ ജില്ലകളില്‍ ഒഴിവുള്ളത് 20,000 സീറ്റ്
മലപ്പുറം: തിരുവനന്തപുരം മുതല്‍ തൃശൂര്‍ വരെ 21, 743 സീറ്റുകള്‍ ഒഴിഞ്ഞു കിടക്കുമ്പോള്‍ മലബാറിലെ സീറ്റ് കുറവ് പരിഹരിക്കാന്‍ സര്‍ക്കാര്‍ നല്‍കുന്നത് 14 ബാച്ചുകളില്‍ ആയിരത്തില്‍ താഴെ സീറ്റുകള്‍ മാത്രം. ഹയര്‍ സെക്കന്‍ഡറി, വൊക്കേഷണല്‍ ഹയര്‍ സെക്കന്‍ഡറി, ഐ.ടി.ഐ, പോളി ടെക്‌നിക് എന്നിവയില്‍ പത്താം ക്ലാസ് ഉപരിപഠനത്തിന് അര്‍ഹരായ വിദ്യാര്‍ഥികളുടെ കണക്കു പ്രകാരം 21,743 സീറ്റുകളാണ് തെക്കന്‍ ജില്ലകളില്‍ ഒഴിഞ്ഞ് കിടക്കുന്നത്. സി.ബി.എസ്.ഇ, ഐ.സി.എസ്.ഇ എന്നിവയില്‍നിന്ന് കേരള സിലബസിലേക്ക് അപേക്ഷ നല്‍കുന്ന കുട്ടികളെ പരിഗണിച്ചാലും സീറ്റുകള്‍ പതിനായിരത്തിലേറെ ഒഴിഞ്ഞ് കിടക്കും.

സീറ്റ് വേണം
*പാലക്കാട് 9271
*മലപ്പുറം 29577
*കോഴിക്കോട് 7223
*വയനാട് 1786
*കണ്ണൂര്‍ 4714
*കാസര്‍ക്കോട് 3481

സീറ്റ് ഒഴിവ്
*തിരുവനന്തപുരം 990
*കൊല്ലം 2181
*പത്തനംതിട്ട 6277
*ആലപ്പുഴ 3630
*കോട്ടയം 5497
*ഇടുക്കി 1855
*എറണാംകുളം 895
*തൃശൂര്‍ 441