ഫ്രീ റീചാര്‍ജ് അതും മൂന്ന് മാസത്തേക്ക് ഈ വാര്‍ത്തയാണ് സോഷ്യല്‍ മീഡിയയില്‍ ഇപ്പോള്‍ വ്യാപകമായി പ്രചരിക്കുന്നത്. തെരഞ്ഞെടുപ്പ് പ്രമാണിച്ച് രാഷ്ട്രീയ പാര്‍ട്ടികള്‍ സൗജന്യമായി മൂന്നു മാസത്തെ മൊബൈല്‍ റീചാര്‍ജ് നല്‍കുന്നു എന്നതാണ് പ്രചാരണം. ഓഫര്‍ ലഭിക്കണമെങ്കില്‍ ലിങ്കുകളില്‍ കയറി മൊബൈല്‍ നമ്പര്‍ ഉള്‍പ്പടെയുള്ള വിവരങ്ങള്‍ നല്‍കണമെന്ന് ആവശ്യപ്പെടുന്ന സന്ദേശമാണിത്. പക്ഷേ ഇതിനുപിന്നിലെ സത്യാവസ്ഥ എന്താണ്?.. ഒന്നും നോക്കണ്ട 100% തട്ടിപ്പാണ് ഇതെന്നാണ് കേരള പൊലിസ് പറയുന്നത്.

തെരഞ്ഞെടുപ്പ് കാലമായാല്‍ വാഗ്ദാനങ്ങളുടെ പെരുമഴ പതിവാണ്. പെരുമാറ്റച്ചട്ടം നിലവില്‍വരുന്നതുവരെ ആനുകൂല്യങ്ങളും സൗജന്യങ്ങളും സര്‍ക്കാരുകള്‍ പ്രഖ്യാപിക്കും. എന്നാല്‍ ഇതേഘട്ടത്തില്‍ തന്നെ വ്യാജ വാര്‍ത്തകളും ചതിക്കുഴികളുമൊരുക്കി ഓണ്‍ലൈന്‍ തട്ടിപ്പുകാരും സജീവമാകാറുണ്ട്. ഇവയിലേതാണ് ഒറിജിനലെന്നും ഏതാണ് വ്യാജമെന്നും തിരിച്ചറിയാന്‍ കഴിഞ്ഞില്ലെങ്കില്‍ വലിയ അപകടത്തിലാകും ചെന്നുപെടുക.