കൊച്ചി: പൊലിസ് അസോസിയേഷനെതിരേ സരിത എസ്. നായര്‍ സോളാര്‍ കമ്മിഷനില്‍ നല്‍കിയ മൊഴിയിലെ മുഴുവന്‍ ആരോപണങ്ങളെക്കുറിച്ചും താന്‍ അന്വേഷിച്ചിരുന്നില്ലെന്ന് രഹസ്യാന്വേഷണവിഭാഗം ഡിവൈ.എസ്.പി മുഹമ്മദ് ഷാഫി. സോളാര്‍ തട്ടിപ്പ് ആരോപണങ്ങളെക്കുറിച്ചന്വേഷിക്കുന്ന ജസ്റ്റിസ് ജി.ശിവരാജന്‍ കമ്മിഷന്‍ മുന്‍പാകെയാണ് ഡിവൈ.എസ്.പി മൊഴി നല്‍കിയത്.

2016 ഫെബ്രുവരി അഞ്ചിന് പൊലിസ് അസോസിയേഷന്‍ ജനറല്‍ സെക്രട്ടറി ജി.ആര്‍.അജിത് സംസ്ഥാന പൊലിസ് മേധാവിക്ക് നല്‍കിയ പരാതിയെക്കുറിച്ച് മാത്രമായിരുന്നു താന്‍ അന്വേഷിച്ചത്. അന്വേഷണത്തിന്റെ ഭാഗമായി സരിതയെ കാണുകയോ ചോദ്യം ചെയ്യുകയോ ചെയ്തിരുന്നില്ല.
തന്റെ അന്വേഷണത്തിന്റെ ഭാഗമായി സരിത ഒഴികെ മറ്റു പൊലിസ് അസോസിയേഷന്‍ ഭാരവാഹികളേയും ടീം സോളാര്‍ ഉദ്യോഗസ്ഥരേയും കണ്ട് വിവരങ്ങള്‍ ശേഖരിച്ചിട്ടുണ്ട്. ഇന്റലിജന്‍സ് നടത്തുന്ന അന്വേഷണങ്ങള്‍ രഹസ്യ സ്വഭാവമുള്ളതാണ്. സരിതയെ ഓഫിസില്‍ വിളിച്ചുവരുത്തി രഹസ്യമായി വിവരങ്ങള്‍ ശേഖരിക്കുന്നതിന് പ്രയാസമുണ്ടാവുമെന്ന് മനസിലാക്കിയതിനാലാണ് അന്വേഷണത്തില്‍ അവരെ ഉള്‍പ്പെടുത്താതിരുന്നതെന്നും ഡിവൈ.എസ്.പി കമ്മിഷനില്‍ മൊഴി നല്‍കി. പൊലിസ് അസോസിയേഷന്‍ ജനറല്‍ സെക്രട്ടറി ജി.ആര്‍ അജിത് ഡി.ജി.പിക്ക് നല്‍കിയ പരാതി അദ്ദേഹം ഇന്‍ലിജന്‍സ് എ.ഡി.ജി.പി ആയിരുന്ന എ.ഹേമചന്ദ്രന് കൈമാറിയതിന്റെ അടിസ്ഥാനത്തിലാണ് അന്വേഷണച്ചുമതല തനിക്ക് ലഭിച്ചത്.

2013ല്‍ സംസ്ഥാന പൊലിസ് അസോസിയേഷന്റെ 30ാം സംസ്ഥാന സമ്മേളനത്തോടനുബന്ധിച്ച് പുറത്തിറക്കിയ സ്മരണികയില്‍ ടീം സോളാറിന്റെ പരസ്യം നല്‍കിയിരുന്നു. ഇതിനായി 20 ലക്ഷം രൂപ സരിത നല്‍കിയെന്നും അവരുടെ അറസ്റ്റിനുശേഷമാണ് 'എ വെല്‍വിഷര്‍' എന്നു സ്മരണികയില്‍ പരസ്യം നല്‍കിയതെന്നുമുള്ള സരിതയുടെ ആരോപണത്തെക്കുറിച്ചും സരിതയുമായി ചേര്‍ന്ന് പൊലിസ് അസോസിയേഷന്‍ മുന്‍ഭാരവാഹികളായ സി.ആര്‍ ബിജുവും ബാബുരാജും ചേര്‍ന്ന് ഗൂഢാലോചന നടത്തിയോ എന്നും അന്വേഷിക്കാനാണ് തന്നെ നിയോഗിച്ചതെന്നും മുഹമ്മദ് ഷാഫി മൊഴി നല്‍കി.