തിരുവനന്തപുരം മുതലപ്പൊഴിയില്‍ വള്ളം മറിഞ്ഞ് ഒരു മരണം; മൂന്ന് പേരെ കാണാതായി

തിരുവനന്തപുരം: മുതലപ്പൊഴിയില്‍ വള്ളം മറിഞ്ഞ് ഒരു മരണം. മത്സ്യത്തൊഴിലാളിയായ പുതുക്കുറുച്ചി സ്വദേശി കുഞ്ഞുമോനാണ് മരിച്ചത്. വള്ളത്തിലുണ്ടായിരുന്ന മൂന്നു പേരെ കാണാതായി. പുതുക്കുറുച്ചി സ്വദേശികളായ ബിജു, മാന്‍ഡസ്, ബിജു എന്നിവരെയാണ് കാണാതായത്. പുലര്‍ച്ചെ നാലു മണിയോടെയാണ് അപകടമുണ്ടായതെന്ന് സൂചന.

പെരുമാതുറയില്‍ നിന്നാണ് നാലംഗ സംഘം മത്സ്യബന്ധനത്തിന് പുറപ്പെട്ടത്. പുതുക്കുറുച്ചി സ്വദേശിയായ ആന്റണി ഉടമസ്ഥതയിലുള്ള വള്ളമാണ് അപകടത്തില്‍പ്പെട്ടത്. ശക്തമായ കാറ്റിലും തിരയിലുംപ്പെട്ട് മുതലപ്പൊഴിയില്‍ വച്ച് വള്ളം മറിയുകയായിരുന്നു. തുടര്‍ന്ന് നടത്തിയ തിരച്ചിലില്‍ അബോധവസ്ഥയില്‍ കണ്ടെത്തിയ കുഞ്ഞുമോനെ ചിറയിന്‍കീഴ് ആശുപത്രിയില്‍ പ്രവേശിപ്പിച്ചെങ്കിലും മരിച്ചിരുന്നു.