കുട്ടി ക്രോസ് ചെയ്തത് അറിയാതെ സ്‌കൂള്‍ വാന്‍ മുന്നോട്ടെടുത്തു; രണ്ടാം ക്ലാസുകാരിക്ക് ദാരുണാന്ത്യം

തൃശൂര്‍: വേലൂരില്‍ സ്‌കൂള്‍ വാനിടിച്ച് വിദ്യാര്‍ഥിനി മരിച്ചു. തൃശൂര്‍ വേലൂരില്‍ നാലുമണിയോടെയാണ് അപകടമുണ്ടായത്. പണിക്കവീട്ടില്‍ രാജന്‍ വിദ്യ ദമ്പതികളുടെ മകള്‍ ദിയ (08) ആണ് മരിച്ചത്. വീടിന് മുന്നില്‍ വെച്ചാണ് അപകടം. തലക്കോട്ടുക്കര ഒയിറ്റ് സ്‌കൂളിലെ രണ്ടാം ക്ലാസ് വിദ്യാര്‍ഥിയാണ് ദിയ.

സ്‌കൂള്‍ വാനിറങ്ങിയ ഉടനെ കുട്ടി റോഡിന് കുറുകെ കടക്കുമ്പോഴായിരുന്നു അപകടം. സ്‌കൂള്‍ വാനില്‍ നിന്നിറങ്ങിയ ദിയ വാനിനു മുമ്പിലൂടെ റോഡ് മുറിച്ചു കടക്കുകയായിരുന്നു. കുട്ടി ക്രോസ് ചെയ്തത് അറിയാതെ വാഹനം മുന്നോട്ടേടുത്തപ്പോള്‍ ഇടിയേറ്റ് താഴെ വിഴുകയായിരുന്നു. ഉടന്‍ തന്നെ കുട്ടിയെ ആശുപത്രിയിലെത്തിച്ചെങ്കിലും മരണം സംഭവിക്കുകയായിരുന്നു. ശില്പ, നിത്യ എന്നിവര്‍ സഹോദരിമാരാണ്.

അതേസമയം, കൊഴിഞ്ഞാമ്പാറയില്‍ പഴയ വീട് പൊളിക്കുന്നതിനിടെ ചുവരിടിഞ്ഞുവീണു രണ്ട് യുവാക്കള്‍ മരിച്ചു. ഉച്ചയ്ക്ക് മൂന്നരയോടെ കൊഴിഞ്ഞാമ്പാറ ഗവ. ആശുപത്രിക്ക് സമീപമായിരുന്നു സംഭവം. പെരുവമ്പ് വെള്ളപ്പന സി. വിനു (36), പൊല്‍പ്പുള്ളി വേര്‍കോലി എന്‍.വിനില്‍ (32) എന്നിവരാണ് മരിച്ചത് മൃതദേഹം ജില്ലാ ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്.