ഐ.ആര്‍.സി.ടി.സി വെബ്‌സൈറ്റ് തകരാറില്‍; ഓണ്‍ലൈന്‍ ടിക്കറ്റ് ബുക്കിങ്ങ് സംവിധാനം നിലച്ചു

ഡല്‍ഹി: ഇന്ത്യന്‍ റെയില്‍വേയുടെ ഔദ്യോഗിക ഓണ്‍ലൈന്‍ ടിക്കറ്റ് ബുക്കിങ്ങ് സംവിധാനം തകരാറില്‍. ഐ.ആര്‍.സി.ടി.സി വെബ്‌സൈറ്റും മൊബൈല്‍ ആപ്പും പൂര്‍ണമായും പ്രവര്‍ത്തനരഹിതമാണ്. ഇന്നു രാവിലെ മുതലാണ് ടിക്കറ്റ് ബുക്കിങ്ങില്‍ തടസം നേരിട്ടത്.

വെബ്‌സൈറ്റിലെ സാങ്കേതിക തകരാറാണ് പ്രശ്‌നത്തിന് കാരണമെന്നും ഉടന്‍ പരിഹരിക്കുമെന്നും റെയില്‍വേ അറിയിച്ചു. ഔദ്യോഗിക ബുക്കിങ്ങ് സംവിധാനങ്ങള്‍ തകരാറിലാണെങ്കിലും സ്വകാര്യ ആപ്പുകള്‍ വഴി ടിക്കറ്റ് ബുക്ക് ചെയ്യാനാകും.

ടിക്കറ്റ് ബുക്ക് ചെയ്യാന്‍ സാധിക്കാത്തതിന്റെ സ്‌ക്രീന്‍ഷോട്ട് ഉള്‍പ്പെടെ നിരവധിപ്പേര്‍ സമൂഹമാധ്യമങ്ങളില്‍ പങ്കുവെച്ചിരുന്നു. ടിക്കറ്റ് ബുക്ക് ചെയ്യാന്‍ ശ്രമിക്കുന്നതിനിടെ പണം നഷ്ടപ്പെട്ടതായും പരാതികള്‍ ഉയരുന്നുണ്ട്.